Дзяніс Самсонаў: «Народ б'юць — а ты ездзіш па розных краінах і там застаешся. Гэта крывадушнасць»

У склад зборнай Беларусі па пляжным футболе каманды не ўключаныя шэсць футбалістаў, якія падпісалі ліст спартоўцаў супраць гвалту

Нападнік нацыянальнай каманды Беларусі па пляжным футболе Дзяніс Самсонаў у новым выпуску на канале «ЧестнОК» распавёў пра тое, што не шкадуе пра свой подпіс у лісце супраць гвалту і за новыя сумленныя выбары.

«Гвалт не спыніць нейкімі паўмерамі, для гэтага павінны прымацца выразныя захады, а калі не – то гэта ўсё працягваецца. Нават калі б я не падпісаўся, то не хацеў бы ў гэтай зборнай заставацца. З імі ў адной камандзе я не хацеў бы быць, нават калі б мяне не выганялі. Народ б'юць — а ты ездзіш па розных краінах і там застаешся. Гэта крывадушнасць», — заявіў Самсонаў.

Зборная Беларусі па пляжным футболе пачала падрыхтоўку, паведамляе Tribuna.com. У склад каманды на зборах не ўключаныя шэсць футбалістаў, якія падпісалі ліст спартыўнай грамадскасці, якія выступаюць за новыя выбары і супраць гвалту: Іван Мірановіч, Ігар Брыштэль, Дзяніс Самсонаў, Валерый Макарэвіч, Ілля Савіч і Канстанцін Магалецкі.

Паводле Tribuna.com