Фрыстайлістка-чэмпіёнка Аляксандра Раманоўская шукае працу ў ІТ

Чэмпіёнка свету па фрыстайле Аляксандра Раманоўская сышла са спорту і распачынае кар'еру ў сферы ІТ. Журналісты заўважылі на яе старонцы ў LinkedIn паведамленне аб пошуку працы.

Аляксандра спрабуе ўладкавацца на пазіцыю QA engineer. Яна згодная прайсці стажыроўку, каб набрацца вопыту. 26-гадовая спартсменка перавучылася на ІТ-спецыяліста, прайшоўшы неабходныя курсы.

Лёс Аляксандры Раманоўскай — ілюстрацыя да таго, што сёння адбываецца з беларускім спортам і з фрыстайлам, у прыватнасці. У 2020 годзе яна выказался за перамены, за што праз пэўны час была звольненая з нацыянальнай зборнай нягледзячы на тое, што была чэмпіёнкай свету і мела выдатныя перспектывы на далейшыя поспехі.

У 2021 годзе яе затрымалі — меркавана, за налепку «Пагоні» на аўтамабілі — і аштрафавалі на буйную суму.

Тым часам з фрыстайлу выціснулі і легендарнага трэнера Мікалая Казеку, які таксама пасля выбараў выразна артыкуляваў прыхільнасць да перамен у Беларусі. Цяпер 72-гадовы спецыяліст на пенсіі, хаця пачуваецца бадзёра і яшчэ мог бы быць карысным ва ўлюбёнай справе. Гэта менавіта дзякуючы Казеку ў краіне паўстаў фрыстайл і стаў адным з самых паспяховых відаў спорту. З 1998 года з кожнай Алімпіяды беларускія лыжныя акрабаты прывозілі медалі — часта залатыя. І ледзь не кожны казаў у інтэрв'ю, што гэтая перамога — у тым ліку перамога Мікалая Казекі.

Да мінулага лета зборную праз адсутнасць Казекі трэніраваў яго вучань і ў мінулым тытулаваны фрыстайліст Дзмітрый Дашчынскі. Аднак у той атмасферы, у якой зараз існуе беларускі спорт, ён доўга не вытрываў і сышоў. Што характэрна: без працы не застаўся і неўзабаве з'ехаў працаваць у Аўстралію. Дашчынскаму — вось ён, знак прафесійнай якасці — там адразу даверылі нацыянальную зборную. У Аўстралію ён адправіўся адразу з сям'ёй, лічы, проста эміграваў.

А ў Беларусі няма чаго лавіць яшчэ і таму, што праз саўдзел Лукашэнкі ў расійскай агрэсіі супраць Украіны амаль увесь спорт аказаўся ў міжнароднай ізаляцыі. Фрыстайл не выключэнне — больш аніякіх Кубкаў і чэмпіянатаў свету і іншых турніраў. Больш аніякіх перспектыў.

Аляксандры Раманоўскай «НЧ» жадае поспехаў у новым жыцці, бо таленавіты чалавек таленавіты ва ўсім. Няма сумневаў, што салідарныя беларусы абавязкова зробяць ёй добрую прафесійную прапанову, ад якой дзяўчына не зможа адмовіцца.

Хочаце ведаць больш? Сачыце за нашымі публікацыямі ў Telegram і Facebook!

Больш цікавага на «Новым Часе»: