Афганістан: Талібы забаранілі паказваць жанчын у тэлесерыялах

Ісламісцкі рух «Талібан», які захапіў уладу ў Афганістане, выпусціў збор правілаў для тэлеканалаў краіны. Цяпер афганскае тэлебачанне не можа паказваць тэлесерыялы, у якіх ёсць актрысы-жанчыны, а жанчынам-вядучым забаронена з'яўляцца на экране з непакрытай галавой.

Фота Reuters

Фота Reuters


У агучаных інструкцыях пры гэтым не сказана, да якой менавіта ступені павінна быць пакрыта галава жанчын-тэлевядучых: так, каб хустка хавала толькі валасы або ўвесь твар, акрамя вачэй.

Член арганізацыі, якая прадстаўляе журналістаў у Афганістане, Худжатула Муджадэдзі сказаў, што аб'яўленне новых абмежаванняў было нечаканым, а самі правілы — вельмі размытыя. У інтэрв'ю «Бі-бі-сі», ён заявіў, што, калі тэлевяшчальныя кампаніі будуць выконваць усе гэтыя патрабаванні, некаторым з іх, магчыма, давядзецца закрыцца.

Справа ў тым, што цяпер афганскія тэлеканалы ў асноўным паказваюць замежныя серыялы, у якіх галоўныя ролі граюць жанчыны.

Створанае талібамі Міністэрства па распаўсюджванні цноты і выкараненні заганы (гэтае ведамства замяніла ў новым урадзе Міністэрства па справах жанчын) устанавіла восем правілаў для вяшчальнікаў. Копію інструкцыі ў сваім «Твітары» апублікаваў журналіст афганскай тэлекампаніі «Tolo News» Карым Аміні.

Мяркуючы па дакуменце, гэтыя правілы такія:

1. Тэлеканалы не павінны паказваць фільмы, якія супярэчаць прынцыпам шарыяту і афганскім каштоўнасцям.

2. Забараняецца паказваць афганскія і замежныя фільмы, якія распаўсюджваюць і прапагандуюць у афганскім грамадстве замежную культуру і традыцыі і прыводзяць да распаўсюджвання амаральнасці.

3. Змест гумарыстычных і забаўляльных праграм не павінен каго-небудзь зневажаць або абражаць.

4. Забараняецца паказваць серыялы, якія абражаюць рэлігійныя рытуалы і чалавечую годнасць.

5. Нельга паказваць у эфіры відэа ці фільмы, якія дэманструюць інтымныя часткі целаў мужчын і жанчын.

6. Журналісткі-жанчыны павінны насіць ісламскі хіджаб, калі яны з'яўляюцца на экране.

7. Забараняецца паказваць серыялы і падобныя праграмы з акцёрамі-жанчынамі.

8. Строга забараняюцца серыялы, у якіх змяшчаюцца выявы прарока [Махамеда] і яго паплечнікаў.

Адразу пасля прыходу да ўлады талібы значна абмежавалі правы працуючых жанчын і дзяўчат-навучэнцаў у школах і універсітэтах. Талібы загадалі ім заставацца дома, што зрабіла Афганістан адзінай краінай у свеце, якая не дазваляе палове свайго насельніцтва атрымліваць адукацыю і працаваць.

«Часовая забарона»

Талібы запэўнівалі, што гэтае рашэнне часовае і ў першую чаргу накіравана на забеспячэнне бяспекі саміх жанчын.

Аднак пакуль сітуацыя асабліва не змянілася. Талібы дазволілі дзяўчатам вярнуцца ў пачатковую школу, але рэкамендацыі заставацца дома або выходзіць толькі ў суправаджэнні мужчын і з цалкам пакрытым целам для астатніх жанчын застаюцца ў сіле са жніўня гэтага года, калі талібы прыйшлі да ўлады.

У перыяд папярэдняга праўлення талібаў, у 1990-я гады, у Афганістане дзейнічалі нашмат больш жорсткія забароны. Жанчыны не маглі вучыцца і працаваць, а тэлебачанне не было дазволена ў прынцыпе. У краіне была толькі адна радыёстанцыя пад назвай «Голас шарыяту», якая транслявала прапаганду і рэлігійныя праграмы. Людзей, у якіх знаходзілі тэлевізар, каралі, а сам апарат разбівалі. Уладальнікаў відэамагнітафонаў маглі публічна высячы.

Пасля 2001 года, калі ўлада «Талібана» была звергнута, у краіне з'явілася нямала тэле- і радыёстанцый, якія былі створаны пры садзейнічанні заходніх краін і прыватных інвестараў.

Афганскія тэлеканалы паказваюць мноства розных праграм: ад конкурсаў вакалістаў у стылі праекта «Голас» да відэакліпаў і тэлесерыялаў у асноўным турэцкай і індыйскай вытворчасці.


Хочаце ведаць больш? Сачыце за нашымі публікацыямі ў Telegram і Facebook!

Больш цікавага на «Новым Часе»: