Амаль палова расіян дапускае тэракты ў Расіі бліжэйшым часам — апытанне

Амаль палова расіян лічаць, што ў Расіі бліжэйшым часам могуць адбыцца тэракты. Пра гэта сведчыць сацыялагічнае апытанне "Лявада-Цэнтра", якое было праведзена 23–26 кастрычніка, гэта значыць яшчэ да катастрофы з самалётам у Егіпце. 



Фота Reuters

Вынікі апытання апынуліся ў распараджэнні УНІАН.

Адказваючы на пытанне, ці могуць у бліжэйшы час адбыцца тэракты, захопы закладнікаў у Расіі, 7% — адказалі «адназначна так», 41% — «хутчэй так», 28% — «хутчэй не», 6% — не вызначыліся. Не змаглі адказаць 18% апытаных.

Па дадзеных "Лявада-цэнтра", годам раней чакалі тэракты ў РФ 39% апытаных.

Нагадаем, "Ісламская дзяржава" днямі прыстрашыла Расію тэрактамі. Відэазапіс з пагрозамі на рускай мове з музычным суправаджэннем "Хутка, вельмі хутка, кроў пральецца, як акіян" была змешчана на рэсурсе "Аль-Хайят", дзе публікуюцца заявы баевікоў "Ісламскай дзяржавы".

Пры гэтым 76% рэспандэнтаў (тых, хто лічыць, што ў бліжэйшы час у Расіі могуць адбыцца тэракты) заявілі, што іх можа арганізаваць ІДІЛ, 39% — «міжнародныя тэрарысты», 26% — «тэрарысты з Чачні / Паўночнага Каўказа», 17% — «расійскія экстрэмісты / радыкалы». Не змаглі адказаць 6%.

Пры гэтым 58% апытаных асцерагаюцца, што яны ці іх блізкія могуць стаць ахвярай тэракту. 18% — упэўнены, што з імі гэта не здарыцца, 22% — не задумваюцца пра гэта. 3% — не змаглі адказаць.

Апытанне праведзена 23–26 кастрычніка 2015 года па рэпрэзентатыўнай усерасійскай выбарцы гарадскога і сельскага насельніцтва сярод 1600 чалавек ва ўзросце 18 гадоў і старэй у 134 населеных пунктах 46 рэгіёнаў краіны. Размеркаванне адказаў прыводзіцца ў працэнтах ад агульнай колькасці апытаных разам з дадзенымі папярэдніх апытанняў. Статыстычная памылка дадзеных гэтых даследаванняў не перавышае 3,4%