Bellingcat: новае фота «Бука» — доказ датычнасці РФ да крушэння MH17

Новае фота "Бука", апублікаванае ўчора, 19 кастрычніка, даказвае датычнасці Расіі да крушэння MH17, лічыць Вellingcat.

Пасля публікацыі здымка "Бука" ў Макееўцы "не можа быць сумневаў" у тым, што самалёт збілі з расійскага ЗРК, перакананыя ў Bellingcat.

Экспертна-журналісцкая група Bellingcat лічыць новае фота "Бука", апублікаванае Аб'яднанай следчай групай (JIT) у чацвер, 19 кастрычніка, доказам таго, што Boeing, які выконваў рэйс MH17, збіў расійскі зенітны ракетны комплекс (ЗРК).

Паводле ацэнкі групы следчых, адметныя асаблівасці адлюстраванага на здымку ЗРК "цалкам супадаюць з тымі, што бачныя на правым борце "Бука 332" у Расіі амаль за 4 тыдні" да крушэння самалёта "Малайзійскіх авіяліній" на ўсходзе Украіны.

"Пасля сённяшняга дня, калі быў апублікаваны дзевяты доказ прысутнасці на ўсходзе Украіны ўстаноўкі, якая належала Узброеным сілам Расійскай Федэрацыі, ніякіх сумневаў у гэтым быць не можа", — гаворыцца ў паведамленні Bellingcat.

 Здымак таго самага "Бука"

 У сваю чаргу, у JIT пакуль пэўных высноваў па апублікаванай фатаграфіі не агучвалі. Паводле інфармацыі следчых, фатаграфія была, верагодна, зробленая ў горадзе Макееўка 17 ліпеня 2014 года, у дзень трагедыі. "JIT падазрае, што гэта менавіта той "Бук", з якога быў збіты рэйс МН17", — адзначаецца ў паведамленні следчай групы ў сацыяльнай сетцы "ВКонтакте".

У той жа час JIT звярнулася да грамадскасці з просьбай паведаміць дэталі пра абставіны гэтага здымка тых, каму штосьці пра гэта вядома.

Нагадаем, Boeing-777, які выконваў рэйс MH17 з Амстэрдама ў Куала-Лумпур, меркавана быў збіты ракетай над тэрыторыяй Данецкай вобласці 17 ліпеня 2014 года. Усе 298 чалавек, што знаходзіліся на борце, загінулі.

Паколькі дзве траціны ахвяр былі падданымі Нідэрландаў, расследаванне авіякатастрофы праводзіцца ў гэтай краіне. У ходзе расследавання было ўстаноўлена, што самалёт быў збіты з "Бука", вырабленага ў Расіі. Следства па справе аб крушэнні самалёта працягваецца.

Паводле www.dw.com