Чаму вакцынаваныя таксама паміраюць ад ковіду і ці варта адмаўляцца ад прышчэпкі?

18 кастрычніка ад ускладненняў пасля ковіду памёр былы дзяржсакратар ЗША Колін Паўэл. Палітык прайшоў поўны курс вакцынацыі супраць інфекцыі. Яму было 84 гады, і палітык хварэў на множную міелому — рак крыві. Атрымліваецца, нават калі чалавек мае прышчэпку, ён усё роўна можа памерці ад ковіду. Навошта ж тады прышчапляцца? У размове з CNN гэта патлумачыла амерыканскі медыцынскі аналітык, доктар Ліана Уэн, піша Наша Ніва.

Перш за ўсё медык нагадвае, што супрацьковідныя вакцыны добра дапамагаюць прадухіліць захворванне.
І нават калі чалавек усё ж захварэў, наяўнасць вакцыны павышае шансы перанесці хваробу ў лёгкай форме.
То-бок вакцына не гарантуе, што вы не захварэеце на ковід. Але адсутнасць такой гарантыі не азначае, што вакцына не працуе ці што яна не патрэбная.
Некаторыя пацыенты больш схільныя да таго, каб пераносіць ковід у цяжкай форме. Сярод іх — пажылыя людзі і тыя, хто мае хранічныя хваробы. Пад асаблівай рызыкай знаходзяцца людзі са слабым імунітэтам — напрыклад, хворыя на рак, як Колін Паўэл.
Амерыканскія медыкі раяць такім пацыентам атрымліваць бустарную дозу вакцыны.
Чым больш людзей мае прышчэпку, тым больш эфектыўна яна дзейнічае. Бо, нават калі вы прайшлі вакцынацыю, але вакол вас шмат інфіцыраваных людзей, вы маеце павышаныя шансы захварэць. У такіх умовах дадатковай абаронай можа стаць нашэнне маскі. І варта не забываць, што мы атрымліваем прышчэпку і дзеля таго, каб абараніць найбольш слабых членаў грамадства, тых, хто ў выпадку хваробы мае вялікія шансы трапіць у шпіталь.
Згодна з даследаваннем амерыканскага Цэнтра па кантролі і прафілактыцы захворванняў, тыя, хто не атрымаў прышчэпку, маюць у 17 разоў большую верагоднасць трапіць у шпіталь, чым цалкам прышчэпленыя дарослыя.
Праца Нацыянальнага інстытута здароўя сведчыць, што ў ЗША за першыя пяць месяцаў пасля таго, як вакцыны сталі даступныя, з іх дапамогай атрымалася прадухіліць больш за 139 тысяч смерцяў.
Таму доктар Уэн падкрэслівае, што вакцынацыя для кожнага — гэта адзіны спосаб знізіць рызыку пацярпець ад ковіду і нарэшце скончыць пандэмію.