Эксперты пацвердзілі сапраўднасць абломкаў зніклага «Боінга»
Самалёт, які выконваў рэйс MH370 з Куала-Лумпура ў Пекін, знік 8 сакавіка 2014 года. На яго борце знаходзіліся 239 чалавек. За два гады зніклы самалёт так і не ўдалося знайсці.
Пясочная скульптура ў памяць аб зніклым самалёце. Фота GETTY IMAGES
Абломак крыла самалёта, які быў знойдзены ў маі каля выспы Маўрыкій у Індыйскім акіяне, з'яўляецца часткай зніклага ў 2014 годзе "Боінга" Malaysia Airlines, гаворыцца ў заяве кіравання транспартнай бяспекі Аўстраліі, паведамляе ВВС.
З моманту выяўлення абломка малайзійскія і аўстралійскія эксперты праводзілі яго аналіз. У абломка крыла быў унікальны ідэнтыфікацыйны нумар, па якім эксперты і вызначылі яго прыналежнасць да зніклага самалёта.
Высновы аўстралійскіх экспертаў пацвердзіла міністэрства транспарту Малайзіі.
Нагадаем, 8 сакавіка 2014 года рэйс MH370 з Куала-Лумпура ў Пекін знік праз 40 хвілін пасля вылету, калі знаходзіўся над Паўднёва-Кітайскім морам. Пасля знікнення самалёта ратавальнікі доўгі час не маглі высветліць ні прыкладныя месцы яго магчымага падзення, ні сляды катастрофы. Пасля пошукавая група пачала знаходзіць абломкі ў розных раёнах Індыйскага акіяна.
Летам мінулага года абломкі былі знойдзены каля французскай выспы Рэюньён, што знаходзіцца на ўсход ад Мадагаскара. Таксама абломкі знаходзілі ля вострава Пемба, які належыць Танзаніі.
Тым не менш, пакуль не ўдалося знайсці сам самалёт ці адчувальна звузіць зону пошуку. Да гэтага часу так і не ясна, што канкрэтна адбылося з самалётам.
Да снежня пошукавая каманда павінна скончыць даследаванне зоны плошчай 120 тысяч квадратных кіламетраў у Індыйскім акіяне.