Фінляндыі і Швецыя падалі заяўкі на ўступленне ў NATO

Швецыя і Фінляндыя падалі заяўкі на ўступленне ў NATO. Сёння раніцай у Бруселі генеральны сакратар альянсу Енс Столтэнберг прыняў іх ад паслоў гэтых краін.


Аб падачы заявак адначасова паведамілі місіі Швецыі і Фінляндыі пры NATO.

Парламент Фінляндыі 17 траўня ўхваліў падачу заяўкі на ўступленне краіны ў NATO. «За» прагаласавалі 188 дэпутатаў, 8 — «супраць».

Раней прэзідэнт краіны Саўлі Нійністэ і ўрад ужо заяўлялі, што прынцыповае рашэнне аб гэтым прынята.

Фінляндыя захоўвала нейтралітэт пасля завяршэння Другой сусветнай вайны. Ідэя аб далучэнні да NATO, паводле апытанняў, карысталася ўсё больш папулярнасцю ў апошнія гады, аднак канчатковае рашэнне было прынятае на фоне ўварвання Расіі ва Украіну.

Такое ж рашэнне ўхваліла Швецыя. Прадугледжваецца, што заяўкі дзвюх краінаў будуць разглядацца сумесна. Для іх далучэння да блоку патрэбна аднагалоснае галасаванне астатніх яго ўдзельнікаў.

Напярэдадні аб сваёй нязгодзе з уступленнем дзвюх краін заявіў прэзідэнт Турцыі Рэджэп Эрдаган. Ён абвінаваціў Хельсінкі і Стакгольм у падтрымцы тэрарызму — гэтыя краіны даюць прытулак палітычным супернікам турэцкага прэзідэнта, якіх Анкара лічыць тэрарыстамі.



Хочаце ведаць больш? Сачыце за нашымі публікацыямі ў Telegram і Facebook!

Больш цікавага на «Новым Часе»: