Генпракурор РФ даручыў праверыць кампаніі, якія заявілі, што сыходзяць з расійскага рынку

Генеральны пракурор Расіі Ігар Красноў даручыў узмацніць нагляд за выкананнем закона кампаніямі, якія заявілі аб прыпыненні дзейнасці на тэрыторыі краіны, паведамляе «Інтэрфакс».

Пракуратура сказала, што ўсталявала «жорсткі кантроль» за захаваннем працоўнага заканадаўства, у тым ліку ўмовы працоўных дагавораў, парадак выплаты заробкаў, а таксама выкананне абавязацельстваў перад Расіяй і контрагентамі.

Генпракурор Расіі звярнуў асаблівую ўвагу на захаванне правоў «сацыяльна неабароненых груп работнікаў — людзей з абмежаванымі магчымасцямі, цяжарных, жанчын, якія маюць малалетніх (непаўналетніх) дзяцей, грамадзян перадпенсійнага і пенсійнага ўзросту», гаворыцца ў паведамленні.

Расійская пракуратура абяцае ацаніць кожны факт спынення дзейнасці кампаніямі на наяўнасць прыкмет фіктыўнага або наўмыснага банкруцтва, за якія прадугледжаная крымінальная адказнасць.

Паводле meduza.io, www.interfax.ru