Яўген Царкоў

Дэпутат-камуніст Вярхоўнай Рады Украіны з’яўляецца аўтарам закона аб прапагандзе гомасэксуалізму, які быў на днях прыняты на ўра.



Закон выклікаў палітычную буру, паколькі дае падставы казаць, што дзейнасць парламента мае выключна папулісцкі характар. Як высветлілася пасля галасавання, у тэксце закону няма ні слова пра інфармацыйную абарону дзяцей (дзеля якіх закон, быццам, і прымаўся), як няма і абавязковых дэфініцый такіх паняццяў, як «гомасэксуалізм» і «прапаганда гомасэксуалізму». Затое выразна і цвёрда вызначаны меры пакарання — ад шматтысячных штрафаў да пяцігадовага турэмнага зняволення, пад якія, па словах праваабаронцаў, можна падвесці нават тых, хто прадае дыскі з запісамі Элтана Джона або Фрэдзі Меркуры. Нарэшце, закон настолькі сапсаваў імідж Украіны, што яго раскрытыкаваў нават МЗС, які, быццам, прадстаўляе інтарэсы дэпутацкай большасці. «Нашы народныя выбраннікі, гуляючы з пэўнымі настроямі часткі грамадства, павінны разумець, што яны тым самым гэта грамадства проста падстаўляюць. Падабаецца нам гэта ці не, але гамафобія і еўраінтэграцыя несумяшчальныя», — адзначыў дырэктар дэпартамента інфармацыйнай палітыкі МЗС Украіны Алег Валошын. Эксперты ў Кіеве не выключаюць, што дэпутатам давядзецца прагаласаваць за адмену свайго ж рашэння, як гэта было з нядаўнім законам пра паклёпы. Між тым, Царкоў ужо пераключыўся на барацьбу за аднаўленне ў цэнтры Адэсы дэмантаванага ў 1990-я гады помніка Леніну.