Кім Чэн Ын паабяцаў у траўні публічна дэмантаваць ядзерны палігон

Лідэр Паўночнай Карэі паабяцаў у траўні запрасіць на закрыццё ядзернага палігона журналістаў і экспертаў у галіне бяспекі. Ён запэўніў, што ўсё абсталяванне знаходзіцца ў працоўным стане.

Лідэр КНДР Кім Чэн Ын заявіў на міжкарэйскім саміце, што ядзерны палігон Пхунгеры закрыюць у траўні, працэс яго дэмантажу будзе публічным. Пра гэта паведаміў журналістам на брыфінгу ў Сеуле Юн Ён Чан, прэс-сакратар прэзідэнта Паўднёвай Карэі.
Кім Чэн Ын паабяцаў запрасіць у КНДР журналістаў і экспертаў у галіне бяспекі, якія будуць сачыць за закрыццём палігона. Ён адхіліў заявы пра тое, што паўночнакарэйскі бок пагадзіўся дэмантаваць аб'екты на палігоне, паколькі яны больш непрыдатныя. «Некаторыя кажуць, што Поўнач знішчае аб'екты, якія не працуюць, але вы ўбачыце, што яны ў добрым стане», — сказаў лідэр КНДР.
Па словах прадстаўніка прэзідэнта Паўднёвай Карэі, паўночнакарэйскі лідэр таксама заявіў, што ў выпадку падпісання мірнай дамовы з ЗША ў КНДР не будзе неабходнасці ў ядзернай зброі.
«Людзі ўбачаць, што я не той чалавек, які запускае ядзерную зброю ў бок Паўднёвай Карэі, Ціхага акіяна ці ЗША», — прыводзіць агенцтва словы Кім Чэн Ына.
«Навошта нам мець ядзерную зброю і жыць у цяжкім становішчы, калі мы спрабуем будаваць з амерыканцамі даверныя адносіны, і яны [ЗША] абяцаюць нам спыніць вайну і не нападаць на нас? (На КНДР)», — дадаў ён.
Пхеньян выступае за тое, каб не паўтаралася «хваравітая гісторыя Карэйскай вайны» 1950-1953 гадоў, падкрэсліў лідэр КНДР.
27 красавіка лідэры Паўднёвай і Паўночнай Карэі — Мун Чжэ Ян і Кім Чэн Ын - сустрэліся ў памежным пункце Пханмунджом. Па выніках гэтых гістарычных перамоў бакі, у прыватнасці, дамовіліся заключыць мірнае пагадненне да канца 2018 года, а таксама дамагацца поўнай дэнуклеарызацыі Карэйскага паўвострава.
Паводле РБК