Крэмль не каментуе артыкул "Новай газеты" пра забойцаў Нямцова

Прэс-сакратар прэзідэнта Расіі Дзмітрый Пяскоў не стаў каментаваць Бі-бі-сі інфармацыю "Новай газеты" аб тым, што Уладзіміру Пуціну вядома імя заказчыка забойства апазіцыйнага палітыка Барыса Нямцова.



150311090141_boris_nemtsov_portrait_624x351_reuters.jpg

"Гэта павінна каментаваць "Новая газета", — сказаў ён.

У аўторак "Новая газета" паведаміла, што на мінулым тыдні прэзідэнту быў прадстаўлены даклад аб ходзе расследавання забойства Нямцова, у якім, па інфармацыі выдання, называлася імя арганізатара злачынства.

Акрамя таго, газета паведаміла пра існаванне "расстрэльнага спісу", у які нібыта ўключаны шэраг расійскіх палітыкаў і журналістаў. У прыватнасці, па інфармацыі выдання, акрамя Нямцова туды ўваходзяць Аляксей Венядзіктаў, Міхаіл Хадаркоўскі і Ксенія Сабчак.

У каментары для радыёстанцыі "Эхо Москвы" Пяскоў назваў гэтыя звесткі абсурдам. Ён таксама падкрэсліў, што за каментарамі аб ходзе і дэталях расследавання забойства апазіцыянера неабходна звяртацца да следства.

"Мне невядомыя дэталі ўсіх дакладаў праваахоўных і сілавых службаў. Дый немагчыма іх раскрываць", — сказаў Пяскоў.

Барыс Нямцоў быў забіты ўвечары 27 лютага на Вялікім Маскварэцкім мосце ў непасрэднай блізкасці ад Крамля. Па падазрэнні ў дачыненні да забойства раней былі затрыманыя, а затым арыштаваныя пяць чалавек.

Паводле дадзеных следства, меркаваным забойцам Нямцова з'яўляецца Заур Дадаеў — былы намеснік камандзіра чачэнскага батальёна МУС "Поўнач". Раней прадстаўнікі следства заяўлялі, што ён ужо прызнаўся ў здзяйсненні злачынства, аднак праваабаронцам Дадаеў паведаміў, што не забіваў апазіцыянера.

Па словах Дадаева, яго вымусілі даць паказанні з прызнаннем віны ў абмен на вызваленне яго таварыша Руслана Юсупава. Падчас візіту членаў Грамадскай назіральнай камісіі ў СІЗА ён таксама паскардзіўся на жорсткае абыходжанне пасля затрымання.

www.bbc.co.uk