Малдова. Прыднястроўе — за Шэнген

Як піша аўтарытэтная кіеўская газета «Дзеркало Тижня», Масква рыхтуе здачу Прыднястроўскай Малдаўскай Рэспублікі (ПМР). Пра гэта, на думку газеты, сведчаць аднаўленне перамоваў па прыднястроўскаму канфлікту. Справа ў тым, што апошні раз яны мелі месца 5 гадоў таму. З таго часу Ціраспаль (відавочна, не без падтрымкі расійскіх партнёраў) блакаваў магчымасць аднаўлення перамоўнага працэсу, патрабуючы абы чаго — пачынаючы з нармалізацыі знешнеэканамічнай дзейнасці рэгіёна і заканчваючы атрыманнем міжнародных гарантый рэалізацыі раней дасягнутых дамоўленасцяў. Аднак апошнім часам сітуацыя змянілася. Падчас сустрэчы ў Калінінградзе паміж дырэктарамі МЗС Расіі, Польшчы і Германіі міністру Лаўрову быццам зрабілі прапанову, ад якой цяжка адмовіцца. Крэмль дае санкцыю на інкарпарацыю Прыднястроўя ў склад Малдовы. І атрымлівае бязвізавы рэжым з ЕС. Цяжка сказаць, наколькі гэта версія мае права на існаванне, аднак згода прэзідэнта ПМР Смірнова на кансультацыі кажа, што нейкі прэсінг з боку Масквы на яго існуе. Хаця гэта не значыць, што Ціраспаль так проста пагодзіцца стаць падкантрольным Кішынёву. Ёсць яшчэ і Кіеў, які таксама ўдзельнічае ў перамовах і, хутчэй за ўсё, заблакуе любое канструктыўнае рашэнне, пакуль не атрымае нейкі бонус. Менавіта да такога падыходу заклікае «Дзеркало Тижня».

Па матэрыялах украінскай прэсы