Намеснік кіраўніка МЗС Польшчы: Сорамна, што ёсць журналісты, якія падтрымліваюць Лукашэнку

Намеснік кіраўніка МЗС Польшчы адчытаў мясцовы тэлеканал за тыражаванне лукашэнкаўскай прапаганды пра мігрантаў ля польскай мяжы.

Павел Яблоньскі стаў госцем праграмы канала TVN, які вяшчае ў Польшчы (належыць амерыканскаму Discovery, адкрыта крытыкуе польскі ўрад). У эфіры абмяркоўвалі мігрантаў, якія затрымаліся паміж Беларуссю і Польшчай.
Дыскусія адразу ператварылася ва ўзаемны абмен папрокамі: вядучая шоу абвінаваціла чыноўніка ў тым, што польскія ўлады адмаўляюцца ратаваць кінутых на волю лёсу бежанцаў (і нават не пускаюць да іх святароў), а Яблоньскі аблаяў яе за дапамогу беларускай прапагандзе: TVN рэгулярна круціць відэа, знятыя памежнікамі ў Беларусі і накіраваныя на дыскрэдытацыю Польшчы.
«Вам не сорамна, што каталіцкая краіна...» — пачала сваё пытанне журналістка, але дыпламат яе перапыніў: «Мне сорамна, што ў Польшчы ёсць такія тэлеканалы, як ваш. Сорамна, што ёсць журналісты, якія падтрымліваюць Лукашэнку».