Падзенне Су-34 на жылы дом у расійскім Ейску: колькасць ахвяр узрасла
У выніку падзення бамбардзіроўшчыка Су-34 у горадзе Ейску ў Краснадарскім краі, паводле апошніх даных, загінулі 13 чалавек, у тым ліку трое дзяцей, паведамляюць улады. Пры падзенні ваенны самалёт зачапіў дзевяціпавярховы жылы дом. Ратавальнікі завяршылі разбор завалаў да раніцы, распавядае BBC.
«Паводле даных МНС, пасля разбору завалаў у Ейску на
месцы крушэння самалёта знойдзены целы загінулых. Па стане на 6:00 18
кастрычніка ў выніку крушэння 13 чалавек загінулі, у тым ліку трое
дзяцей», — заявіў памочнік міністра аховы здароўя Расіі Аляксей Кузняцоў.
Да гэтага ўлады паведамлялі аб чатырох ахвярах катастрофы бамбардзіроўшчыка. 19 чалавек
атрымалі раненні.
Напярэдадні ўвечары ў горадзе Ейску ў Краснадарскім краі
знішчальнік-бамбардзіроўшчык Су-34 зваліўся ў жылым масіве. Ён зачапіў падчас падзення дзевяціпавярховы жылы дом. Прычынай крушэння Міністэрства абароны РФ назвала
ўзгаранне аднаго з рухавікоў самалёта.
«Самалёт пры падзенні стукнуўся аб дом, разбурыўся, пры гэтым разлілося гаручае. Як такога выбуху не было, таму што побач
стаяць будынкі, у якіх ацалелі нават шыбы. Ніякага выбуху не было, ёсць
пашкоджанне дома, яно характэрнае, усё зразумела», — сказаў журналістам кіраўнік МНС Расіі Аляксандр Куранкоў.
Паводле інфармацыі ваеннага ведамства, самалёт выконваў
вучэбна-трэніровачны палёт з ваеннага аэрадрома і пацярпеў крушэнне пры
наборы вышыні.
Экіпаж паспеў катапультавацца.
Плошча пажару, паводле звестак ратавальнікаў, склала каля дзвюх тысяч квадратных метраў. Пажар цалкам ахапіў адзін з пад'ездаў дзевяціпавярховіка.
«Абрынуліся перакрыцці з дзявятага па пяты паверхі. Агонь
ахапіў пад'езд цалкам, пашкоджаны ў той ці іншай ступені каля 45 кватэр», паведамілі ў панядзелак у пажарнай службе.
Да 22 гадзін у панядзелак пажар быў патушаны, у аўторак да 4
гадзін раніцы быў завершаны разбор завалаў.