Пахаванне Аляксея Навальнага: шмат людзей прыйшлі развітацца з палітыкам. Расійскія ўлады падрыхтавалі аўтазакі

Што адбываецца на пахаванні расійскага апазіцыйнага палітыка Аляксея Навальнага: сабралі фота і факты.

Каманда Аляксея Навальнага заклікала грамадзян прыходзіць на службу і пахаванне раней, а жыхароў іншых гарадоў і краін а 19-й пакласці кветкі да мемарыялаў.

На відэа з пахавання бачныя больш за тысячу людзей, якія прыйшлі на пахаванне Аляксея Навальнага, піша «Радыё Свабода». З раніцы да царквы ў гонар абраза Божай Маці «Суціш мой смутак», дзе а 14-й пачнецца адпяванне Аляксея Навальнага, сцягнулі некалькі дзясяткаў аўтазакаў.

Жывы эфір тэлеканалу «Настоящее время»:

Як можна было пабачыць у ранішняй трансляцыі тэлеканалу «Дождь», аўтазакі прыпаркаваныя ўздоўж дарогі, што вядзе да царквы ў Мар’іне пад Масквой.

На Барысаўскіх могілках, дзе плануюць пахаваць расійскага палітыка, з 29 лютага пачалі дзяжурыць супрацоўнікі паліцыі. На ўездзе таксама стаіць аўтамабіль патрульнай службы, машыны маскоўскіх гарадскіх служб і аўтазак.

Журналісты, як паведаміў тэлеканал «Настоящее время», зафіксавалі некалькіх супрацоўнікаў Цэнтру супрацьдзеяння экстрэмізму (Цэнтру «Э») у цывільным, а каля мэтро «Барысава» — узмоцненыя нарады паліцыі.

Аднак за тры гадзіны да пачатку цырымоніі каля храма ўсё роўна пачалі збірацца людзі.

Калі катафалк прыехаў да царквы і пачалі выносіць труну з целам Навальнага, людзі пачалі пляскаць у далоні і выгукваць: «Аляксей! Аляксей! Аляксей!», «Не прабачым!», «Навальны!», «Расія будзе вольнай!». Прадстаўнікі ягонай каманды паведамілі, што яшчэ патрэбна некалькі хвілін для падрыхтоўкі да службы. Спачатку ў царкву ўвойдуць сваякі, а потым, пэўна, пачнуць запускаць людзей, якія цяпер стаяць у чарзе на развітанне.

Праз пэўны час прадстаўнікі каманды Аляксея Навальнага паведамілі аб праблемах з сувяззю, у выніку чаго немагчыма атрымаць дакладную інфармацыі аб тым, што адбываецца ўнутры царквы. Вакол царквы ў некалькіх месцах святары іншых цэркваў пачалі чытаць малітву.

Якіх-небудзь інцыдэнтаў у царкве і каля яе не адбылося.

Пасля адпявання ў царкве труну з целам Аляксея Навальнага перамясцілі ў катафалк і павезлі на могілкі для пахавання. Натоўп людзей знёс агароджу і накіраваўся за катафалкам у кірунку могілак.

Паводле афіцыйнай версіі, Аляксей Навальны памёр у калоніі 16 лютага. Аднак расійскія праваабаронцы кажуць, што Навальнага, магчыма, катавалі перад смерцю, у прыватнасці звязвалі і катавалі холадам.

Гэтую інфармацыю перадалі галоўнаму расследніку смерці Навальнага Хрысту Грозеву. Gulagu.net заклікаў адкласці пахаванне Навальнага і правесці незалежную экспертызу і даследаванні па-за межамі Расіі.