Скандал у польскім Сейме: дэпутат-украінафоб загасіў вогнетушыцелем габрэйскі падсвечнік

У Варшаве здарыўся гучны скандал — у залі Сейма дэпутат польскай антыўкраінскай ультраправай партыі «Канфэдэрацыя» схапіў вогнетушыцель і загасіў габрэйскі падсвечнік.

З-за гэтага была прыпыненая праца Сейма, і цяпер прэзідэнт Польшчы Анджэй Дуда можа не паспець прывесці да прысягі новы ўрад на чале з новаабраным прэм’ерам Дональдам Тускам. Калі гэтага не адбудзецца, Туск можа не патрапіць на крытычны для Польшчы і Украіны саміт ЕС 14-15 снежня.

Інцыдэнт здарыўся ў другой палове дня падчас дэбатаў пасля выступу новага прэм'ер-міністра Дональда Туска.

Бліжэй да вечара ў будынку з’явіліся прадстаўнікі габрэйскай суполкі, якія святкавалі Хануку на запрашэнне спікера Сейму, піша Gazeta Wyborcza. Людзей частавалі пампушкамі і блінамі, сярод іх было шмат дзяцей.

Гжэгаж Браўн з партыі «Канфэдэрацыя» кінуўся да ханукальнай меноры з парашковым вогнетушыцелем і дэманстратыўна патушыў свечкі.

«Я прашу перапыніць пасяджэнне і выклікаць намесніка Браўна, каб выдаліць яго з пасяджэння. На польскай зямлі, дзе адбыўся Халакост, няма месца антысеміцкім праявам. Пад дахам польскага парламента!» — сказаў дэпутат Вітольд Зембачыньскі. Ён назваў Браўна «экстрэмістам». 

Неўзабаве пасля інцыдэнту на трыбуне Сейма з'явіўся Гжэгаж Браўн, які заявіў, што запальванне меноры было «сатанінскім актам».

Але спікер Шымон Галаўня выключыў яго з пасяджэння і абвясціў перапынак. 

Чым знакаміты Гжэгаж Браўн?

Шымон Галаўня сказаў журналістам, што Браўн, верагодна, заплаціць штраф за свае дзеянні. Іншага, большага пакарання для дэпутата за парушэнне рэгламенту няма.

«Таксама я хачу дакладна заявіць, што на падставе даных маніторынгу, дакладнай кваліфікацыі ўчынку спадара Браўна, на яго будзе пададзеная заява ў пракуратуру, магчыма, паводле артыкулу, які прадугледжвае парушэнне рэлігійных абрадаў», — паведаміў спікер.

На інцыдэнт ужо адрэагаваў амбасадар Ізраіля ў Польшчы Якаў Ліўне.

«Ганьба! Толькі што гэта зрабіў дэпутат польскага парламента. Праз некалькі хвілін пасля таго, як мы там пачалі святкаваць Хануку», — пракаментаваў амбасадар.

«Гэта ганьба. Гэта недапушчальна. Гэта не павінна паўтарыцца», — коратка пракаментаваў інцыдэнт новы прэм'ер-міністр Дональд Туск.

Раней у аўторак Браўн рэтвітнуў паведамленне ў Twitter (X), у якім скардзіўся на прысутнасць габрэйскай сімволікі ў палацах парламента. Паводле яго слоў, Польшчай «кіруюць» людзі, якія служаць іншым народам.

«Канфедэрацыя» — гэта антыеўрапейская і антыўкраінская партыя, якая стаіць за блакадай украінскай мяжы. Тварам страйкаў польскіх перавозчыкаў з’яўляецца кіраўнік люблінскага аддзелу партыі, бізнесовец Рафал Мэклер. 

Сам Гжэгаж Браўн, адзін з лідараў «Канфедэрацыі», вядомы сваімі рэзкімі выказваннямі ў бок Украіны. Ён заклікаў «спыніць бандэрызацыю Польшчы», а таксама заявіў, што «нас не будуць вучыць гісторыі немцы і габрэі».

Перад поўнамаштабным уварваннем ён неаднаразова шкадаваў аб пагаршэнні польска-расійскіх адносін, а ў студзені 2022 года быў адзіным дэпутатам Сейма, які не прагаласаваў за рэзалюцыю з заклікам да ЕС і NATO дапамагчы Украіне.

У лістападзе 2022 года віцэ-спікер Сейма Малгажата Гасеўска назвала Браўна «расійскай унучкай» (чалавек, які распаўсюджвае расійскую прапаганду).