Стральба і выбухі. У Іране ўжо паўтара тыдня працягваюцца масавыя пратэсты (відэа)

У Іране працягваюцца пратэсты з-за смерці 22-гадовай Махсы Аміні, якая памерла пасля затрымання патрулём «Гашт-Э Эршад» (афіцыйная назва мясцовай паліцыі нораваў) з-за няправільна надзетага хіджаба.


Махса Аміні была затрыманая 13 верасня. Яна памерла ў бальніцы 16 верасня.

Беспарадкі ахапілі сталіцу Тэгеран і большасць правінцый краіны.

Адзначаецца, што ў Тэгеране жыхары дамоў падтрымлівалі пратэстоўцаў з вокнаў.

На сталічным бульвары Эбузер дэманстранты спрабавалі падпаліць загароды на дарозе. Для разгону натоўпу паліцыянты ўжылі слезацечны газ і дубінкі.

Як сцвярджаецца, у Тэгеране пратэстоўцы атакавалі адзін з пунктаў Корпуса вартавых ісламскай рэвалюцыі (КВІР) у квартале Рэй.

На кадрах, якія публікуюць у сацсетках відавочцы, чутныя гукі стральбы і выбухаў.

У горадзе Бушэр у паўночнай правінцыі Мазендэран супрацоўнікі праваахоўных органаў ужылі сілу супраць дэманстрантаў, якія скандавалі антыўрадавыя лозунгі.

Карыстальнікі сеціва паведамляюць, што ў нядзелю раніцай у шэрагу гарадоў краіны сілы бяспекі правялі рэйды па затрыманні незадаволеных.

Паводле звестак афіцыйнага іранскага інфармагенцтва IRNA, у Мазендэране ўзятыя пад варту 450 чалавек.

Прынамсі 739 чалавек, уключаючы 60 жанчын, былі затрыманыя напярэдадні ў правінцыі Гілян на поўначы краіны. Пра гэта паведаміў кіраўнік мясцовай паліцыі Азізіёла Малекі.

За апошнія два дні былі затрыманыя дзясяткі студэнтаў.

Праз жорсткасць іранскіх сілавікоў ёсць і ахвяры, але іх колькасць невядомая. І ўвогуле інфармацыі з Ірана, які з'яўляецца вельмі закрытай краінай, бракуе.




Паводле www.aa.com.tr.

Хочаце ведаць больш? Сачыце за нашымі публікацыямі ў Telegram і Facebook!

Больш цікавага на «Новым Часе»: