Швейцарыя запатрабавала ад Расіі спыніць шпіянаж на яе тэрыторыі

Швейцарскія ўлады запатрабавалі ад Расіі спыніць незаконныя выведвальныя аперацыі ў іх краіне. У пятніцу мясцовыя газеты напісалі, што яшчэ вясной у Гаазе па падазрэнні ў шпіянажы затрымалі двух расіян, якіх цікавіла швейцарская лабараторыя, што вывучала матэрыялы па справе Скрыпаляў.

"Швейцарскае ўпраўленне замежных спраў заклікае Расію неадкладна спыніць усе незаконныя аперацыі на швейцарскай зямлі ці ў дачыненні да швейцарскіх аб'ектаў", — гаворыцца ў заяве знешнепалітычнага ведамства Швейцарыі.

Як адзначылі ў заяве, швейцарскі МЗС у гэтым годзе ўжо тройчы выклікаў расійскага пасла, каб выказаць заклапочанасць з нагоды паведамленняў аб шпіёнскіх аперацыях.

У пятніцу швейцарская газета “Tages-Anzeiger” і галандская “NRC Handelsblad” са спасылкай на свае крыніцы напісалі, што двое расійскіх грамадзян былі затрыманыя вясной у Гаазе па падазрэнні ў шпіянажы.

Паводле дадзеных гэтых выданняў, расіяне з'яўляюцца супрацоўнікамі ГРУ, у іх было абсталяванне для ўзлому кампутарнай сеткі лабараторыі.

Як патлумачыла кіраўнік аддзела камунікацыі “NDB Handelsblad” Ізабэла Грабер, аперацыя праводзілася сумесна з галандскімі і брытанскімі спецслужбамі, і ў ходзе яе былі спынены незаконныя дзеянні, накіраваныя супраць асабліва важнай швейцарскай інфраструктуры.

Пракуратура ў Берне паведамляе, што крымінальная справа ў дачыненні да двух расіян была заведзеная яшчэ ў сакавіку 2017 года. Іх імёны не называюцца.

У нядзелю швейцарская газета “Sonntags-Zeitung” напісала, што, паводле ацэнкі аднаго з мясцовых агенцтваў па бяспецы, прыкладна кожны чацвёрты расійскі дыпламат у Швейцарыі з'яўляецца дзеючым або былым супрацоўнікам спецслужбаў.

Расійскае пасольства ў Швейцарыі назвала гэтую ацэнку неабгрунтаванай.

Паводле www.bbc.com