У Брытаніі прадухілілі 13 тэрактаў за чатыры гады

З чэрвеня 2013 года службы бяспекі прадухілілі 13 патэнцыйных тэрактаў у Брытаніі, паведаміў Марк Роўлі — памочнік камісара Скотленд-ярда, які каардынуе антытэрарыстычную працу паліцыі па ўсёй краіне.

Марк Роўлі таксама паведаміў ВВС, што ў паліцыі адначасова вядуцца каля 500 контртэрарыстычных расследаванняў.

Ён распавёў пра гэта, прадстаўляючы інфармацыйную кампанію Action Counters Terrorism "Дзеянні супраць тэрарызму", якая заклікае грамадскасць паведамляць у паліцыю пра свае падазрэнні.

Інфармацыя ад простых грамадзян прыдалася паліцыі ў трэцяй частцы з найбольш рызыкоўных расследаванняў, а таксама дапамагла прадухіліць 13 нападаў, заявіў Роўлі.

У кастрычніку мінулага года кіраўнік брытанскай контрразведкі МІ-5 казаў пра 12 прадухіленыя тэрактах.

Роўлі назваў унёсак жыхароў у барацьбу з тэрарызмам “выдатным” і заявіў: "Некаторая інфармацыя тычылася пераменаў у паводзінах, іншая — падазроных дзеянняў".

У інтэрв'ю BBC Radio 4 ён сказаў, што нягледзячы на ​​тое, што грамадства ўжо адыгрывае вялікую ролю, некаторыя людзі прызнаваліся, што не хацелі дзейнічаць, і сумняваліся, ці трэба звяртацца ў паліцыю.

Роўлі заклікаў брытанцаў давяраць сваім інстынктам і не баяцца звяртацца ў паліцыю, калі нешта выклікае заклапочанасць.

У 2014 годзе ўзровень тэрарыстычнай пагрозы ў Брытаніі быў павышаны да "сур'ёзнага" ў сувязі з актывізацыяй джыхадзістаў ў Іраку і Сірыі.

У Брытаніі існуе пяць узроўняў класіфікацыі тэрарыстычнай пагрозы: "сур'ёзны" азначае, што верагоднасць тэрактаў вельмі высокая. Вышэй за яго толькі пяты ўзровень пагрозы, які азначае, што тэракт абавязкова адбудзецца.

Паводле ВВС