У Казахстане адмянілі вывучэнне рускай мовы з першага класа: спачатку дзеці павінны навучыцца роднай мове

Улады Казахстана адмянілі вывучэнне рускай і англійскай моў для першакласнікаў з новага навучальнага года. Пра гэта паведаміў міністр асветы Асхат Аймагамбетаў.

Паводле слоў міністра асветы краіны, з першага класа дзеці будуць вывучаць толькі казахскую мову, бо для вывучэння рускай і англійскай «ім спачатку трэба навучыцца чытаць і пісаць на роднай мове». Ён адзначыў, што першакласнікам цяжка вывучаць тры мовы адразу.

«З другога класа пачнецца вывучэнне рускай мовы як асобнай дысцыпліны, а з трэцяга класа ва ўсіх школах будзе вывучацца англійская мова», — паведаміў Аймагамбетаў на пасяджэнні ўрада ў аўторак.

Раней школьнікі ў Казахстане пачыналі з першага класа вывучаць тры мовы: рускую, казахскую і англійскую. Вывучэнне англійскай з першага класа з'явілася ў 2012 годзе.

У жніўні ўлады Казахстана абверглі інфармацыю пра тое, што на працягу 6-7 гадоў у краіне маюць намер адмяніць класы на рускай мове. Матэрыял пра гэта выйшаў у эфіры мясцовага тэлеканала. «Як у класах з казахскай мовай навучання, так і ў класах з рускай мовай навучання руская мова працягвае вывучацца ў ранейшым рэжыме, іншых планаў няма», — расказала першая віцэ-міністр асветы Шалпан Карынава.


Хочаце ведаць больш? Сачыце за нашымі публікацыямі ў Telegram і Facebook!

Больш цікавага на «Новым Часе»: