У Крыме адбыўся пажар у казарме з мабілізаванымі на вайну расіянамі. Ёсць загінулыя

«Ці нешта прыляцела, ці воіны напіліся»… У Крыме ў пасёлку Савецкае адбыўся пажар у казарме. Там знаходзіліся ад некалькіх сотняў да тысяч мабілізаваных у армію расіян.

Канал «Крымскі», які выступае з прарасійскіх пазіцый, са спасылкай на крыніцу ва ўрадзе Крыма піша пра тое, што загінулі два чалавекі, а каля 200 вайскоўцаў пасля пажару, як сцвярджаецца, былі пераселены. Паводле гэтага паведамлення, прычынай пажару стала «неасцярожнае абыходжанне з агнём».

Канал «Крымскі вецер», які выступае ў падтрымку Украіны, сцвярджае, што ў казармах жылі мабілізаваныя на вайну супраць Украіны.

У сеціве таксама апублікаваныя відэазапісы з месца інцыдэнту. На іх зафіксавана, як полымя ахапіла вялікую плошчу будынка і падымаецца на некалькі метраў уверх. «Ці нешта прыляцела, ці воіны напіліся, на*уй», — кажа ў роліку яго аўтар.

Паводле розных звестак, у будынку былі размешчаныя ад некалькіх сотняў да некалькіх тысяч мабілізаваных расіян. Колькі з іх насамрэч загінулі ці пацярпелі, не вядома.

Паводле korrespondent.net, meduza.io, t.me/zsuwar