У «ДНР» плануюць ўводзіць прадуктовыя карткі і працягваюць мабілізацыю

«Шэраг «чыноўнікаў» ад ДНР бачаць у гэтым адзіны выхад з цяперашняй сытуацыі», — паведаміў  у Facebook пра ўвядзенне прадуктовых картак у ДНР каардынатар руху «Інфармацыйны супраціў» Дзьмітры Тымчук.



Тымчук таксама паведамляе, што ў ДНР працягваецца «мабілізацыйная кампанія»: «Баевікі рассылаюць  позвы па прадпрыемствах і шахтах. Ёсць распараджэнне кіраўніцтва ДНР мабілізаваць з кожнай буйной шахты і прадпрыемствы мінімум 250 чалавек».

Тымчук паведамляе, што цягам апошніх сутак «расійска-тэрарыстычныя войскі на Данбасе працягвалі груба парушаць ўмовы мірных дамоўленасцей, выкарыстоўваючы для абстрэлаў пазіцый украінскіх войскаў практычна ўвесь спектар наяўных ўзбраенняў — ад стралковай да ствольнай і рэактыўнай артылерыі».

Паводле яго слоў, з боку баевікоў фіксуецца толькі некаторае памяншэнне колькасці артылерыі, якая адводзіцца ў тыл згодна з мінскімі дамоўленасцямі. Цяжкая бранятэхніка застаецца на месцы і ад лініі размежавання не адводзіцца.

Нагадаем, сёння прадстаўнікі МЗС "нармандскай чацвёркі" мусяць абмеркаваць рэалізацыю мінскіх дамоўленасцяў. Адзначаецца, што бакі незадаволеныя як выконваецца рэжым спынення агню. А таксама канстатуецца той факт, што  сацыяльна-эканамічныя ўмовы на паўднёвым усходзе Украіны хутка дэградуюць.