У ЕС будуць правяраць пасажыраў цягнікоў і іх багаж
Міністр унутраных спраў Францыі Бернар Казнеў распавёў пра новыя меры, накіраваныя на ўмацаванне бяспекі на чыгуначным транспарце ў Еўропе, якія былі ўзгодненыя краінамі-членамі ЕС падчас экстранай сустрэчы ў Парыжы.
Саміт быў прызначаны пасля нападу на пасажыраў высакахуткаснага цягніка, які рухаўся з Амстэрдама ў Парыж, у мінулую пятніцу, калі толькі дзякуючы рашучым дзеянням некалькіх пасажыраў удалося пазбегнуць вялікай колькасці ахвяр.
Казнеў распавёў пра галоўныя новаўвядзенні: гэта ўзмацненне кантролю за асобамі пасажыраў і іх багажом на станцыях, узмацненне жорсткасці заканадаўства аб выкарыстанні агнястрэльнай зброі, а таксама больш цеснае супрацоўніцтва спецслужбаў Еўрапейскіх краін.
Міністр унутраных спраў Германіі Томас дэ Мэзьер заявіў, што, хоць і немагчыма адразу пачаць праверкі мільёнаў людзей, якія штодня здзяйсняюць паездкі чыгуначным транспартам па ўсіх краінах Еўрасаюза, але паляпшэнняў у гэтай галіне можна дасягнуць нямала.
У сустрэчы бралі ўдзел міністры з Францыі, Брытаніі, Германіі, Італіі, Іспаніі, Бельгіі, Люксембурга, Нідэрландаў і Швейцарыі.
Напад на пасажыраў высакахуткаснага цягніка Thalys, які рухаўся з Амстэрдама ў Парыж, было здзейснена 21 жніўня.
У выніку стральбы, якую зладзіў мараканец Аюб Каззані, раненні атрымалі тры чалавекі. Нападніка праз некалькі хвілін здолелі нейтралізаваць самі пасажыры. Інцыдэнт адбыўся паблізу горада Аррас на паўночным усходзе Францыі.
У сутычку з нападнікам уступіў Спенсер Стоўн, служачы ў ваенна-паветраных сілах ЗША. Яму дапамагаў Алек Скарлатос, член Нацыянальнай гвардыі ЗША, які нядаўна вярнуўся з камандзіроўкі ў Афганістан, і і брытанец Крыс Норман, які дапамог звязаць нападніка.
Казані быў узброены аўтаматам Калашнікава, аўтаматычным пісталетам з запаснымі патронамі, а таксама меў пры сабе канцылярскі разак для адчынення скрынак. Цяпер ён знаходзіцца ў турме адмысловага рэжыму ў Францыі, яго вінавацяць у падрыхтоўцы і спробе здзяйснення тэрарыстычнага акту.