ЗША заявілі аб скарачэннях бюджэту ААН больш чым на 285 мільёнаў даляраў

Злучаныя Штаты заяўляюць, што ўзгаднілі скарачэнне бюджэту ААН на 2018-2019 гады на суму больш чым 285 мільёнаў даляраў. Вашынгтон называе арганізацыю неэфэктыўнай. Пра гэта паведамляе Радыё Свабода. 

У афіцыйнай заяве амэрыканскага ўраду не пазначаная ўся сума бюджэту Арганізацыі і не пазначана, як гэта паўплывае на ўнёскі ЗША, што з'яўляюцца асноўнай крыніцай фінансавання Арганізацыі Аб’яднаных Нацый.
Сталы прадстаўнік ЗША пры ААН Нікі Хэйлі заявіла, што «неэфэктыўнасьць і перарасход» арганізацыі добра вядомыя, і Вашынгтон не дазволіць «выкарыстоўваць шчодрасць амэрыканскага народа».
«Гэта гістарычнае скарачэнне выдаткаў — у дадатак да шматлікіх іншых крокаў вядзе да большай эфэктыўнасці і падсправаздачнасці ААН — гэта вялікі крок у правільным кірунку», — заявіла Хэйлі.
Яна таксама сказала, што, хоць місія ЗША пры ААН задаволеная вынікамі бюджэтных перамоваў, яна будзе працягваць «шукаць шляхі павышэння эфэктыўнасці ААН, абараняючы нашы (ЗША — РС) інтарэсы».
Раней прэзідэнт ЗША Дональд Трамп прыгразіў, што паменшыць фінансавую дапамогу краінам, якія прагаласуюць за рэзалюцыю ААН, якая асуджае прызнанне Вашынгтонам Ерусаліму сталіцай Ізраілю. «Яны бяруць сотні мільёнаў даляраў і нават мільярды даляраў, а потым галасуюць супраць нас. Што ж, мы сочым за гэтымі галасамі. Няхай галасуюць супраць нас. Мы зэканомім нямала. Нам усё роўна», — заявіў Трамп перад журналістамі ў Белым доме.
21 снежня Генасамблея ААН прыняла рэзалюцыю, што абвясціла несапраўдным рашэнне ЗША прызнаць Ерусалім сталіцай Ізраілю і асудзіла рашэнне Трампа перанесці ў гэты горад амерыканскую амбасаду.
За рэзалюцыю прагаласавала пераважная большасць краін-удзельніц ААН — 128. Дзевяць краін выказаліся супраць, 35 краін устрымаліся. Беларусь галасавала ў падтрымку рэзалюцыі.