Адзін з адвакатаў Кацярыны Барысевіч з’ехаў з Беларусі
Адвакат Міхаіл Баднарчук напісаў заяву з просьбай выключыць яго са складу Мінскай гарадской калегіі адвакатаў. Фота заявы, датаванай 27 красавіка, ён апублікаваў на днях Facebook. У ім ён просіць выключыць яго з калегіі з 30 красавіка.
Адвакаты Кацярыны Барысевіч Андрэй Мачалаў і Міхаіл Баднарчук
Як паведамляе REFORM.by са спасылкай на «Нашу Ніву», Баднарчук з’ехаў з Беларусі ў Кіеў.
«Я вырашыў паставіць на паўзу адвакацкую дзейнасць, паколькі ёй ужо немагчыма займацца так, як я рабіў гэта раней. Па-першае, майго адвакацкага бюро, дзе я працаваў, ужо фактычна няма: адзін партнёр пазбаўлены ліцэнзіі, а ў іншага пэўныя асабістыя праблемы. Па-другое, на момант майго сыходу ўжо было зразумела, што будуць прынятыя змены ў закон аб адвакатуры і адвакацкай дзейнасці, згодна з якім можна будзе працаваць толькі ў рамках юрыдычных кансультацый і пад яшчэ большым кантролем (а фактычна — кіраўніцтвам) Мінюста, што мяне не задавальняе», — прыводзіць выданне яго словы.
Ён паведаміў, што наконт вяртання ў яго няма адназначнага адказу, але падкрэсліў, што ад’езд часовы. Таксама, па яго словах, у яго пакуль няма канкрэтных планаў па далейшай дзейнасці.
«Будзем лічыць гэта бестэрміновым творчым адпачынкам», — дадаў ён.
Міхаіл Баднарчук абараняў інтарэсы шэрагу зняволеных па палітычных матывах, у тым ліку асуджанай па справе аб «нулі праміле» журналісткі Кацярыны Барысевіч і гукарэжысёраў Уладзіслава Сакалоўскага і Кірыла Галанава, вядомых як «дыджэі пераменаў».
Нагадаем, раней Беларусь пакінуў абаронца Кацярыны Андрэевай, адвакат Сяргей Зікрацкі. Ён з’ехаў у Вільню і далучыўся да каманды Святланы Ціханоўскай. Зікрацкі будзе працаваць над рэформай механізмаў абароны правоў беларусаў, а таксама каардынаваць працу па ўніверсальнай юрысдыкцыі і ўзаемадзеянне з міжнароднай платформай па адказнасці.