«Ён адыграў вырашальную ролю ў заканчэнні халоднай вайны». Сусветныя лідары — пра Міхаіла Гарбачова

Сусветныя лідары адрэагавалі на смерць першага і адзінага прэзідэнта СССР Міхаіла Гарбачова заявамі аб тым, што свет не забудзе яго ўнёсак у заканчэнне халоднай вайны і падзенне жалезнай заслоны.


«Міхаіл Гарбачоў быў лідарам, якому давяралі і якога паважалі. Ён адыграў вырашальную ролю ў заканчэнні халоднай вайны і падзенні жалезнай заслоны, што адкрыла дарогу да свабоднай Еўропы. Гэтую спадчыну мы не забудзем» — напісала ў Twitter прэзідэнт Еўракамісіі Урсула фон дэр Ляен.

«Як лідар СССР ён працаваў з прэзідэнтам Рональдам Рэйганам над скарачэннем ядзерных арсеналаў нашых дзвюх краін, каб палегчыць жыццё людзям ва ўсім свеце, якія маліліся аб спыненні гонкі ўзбраенняў. Пасля дзесяцігоддзяў жорсткіх палітычных рэпрэсій ён прыняў дэмакратычныя рэформы», — гаворыцца ў заяве прэзідэнта ЗША Джо Байдэна.

Па словах прэзідэнта ЗША, дзеянні Гарбачова характарызавалі яго як «рэдкага лідара», лідара з дастатковым «уяўленнем, каб убачыць магчымае іншае будучыню, і адвагай рызыкнуць усёй сваёй кар'ерай дзеля дасягнення свайго».

«Я засмучаны навіной аб смерці Гарбачова. Я заўсёды захапляўся мужнасцю і сумленнасцю, якое ён прадэманстраваў, давёўшы халодную вайну да мірнага завяршэння. У часы агрэсіі Пуціна ва Украіне, яго нястомная адданасць адкрыццю савецкага грамадства застаецца прыкладам для ўсіх нас», — заявіў прэм'ер Вялікабрытаніі Борыс Джонсан.

Генеральны сакратар ААН Антоніу Гутэрыш выказаў «глыбокі смутак» пасля смерці Міхаіла Гарбачова. Ён сказаў, што аддае належнае «выключнаму дзяржаўнаму дзеячу, які змяніў хаду гісторыі».

«Ён зрабіў больш, чым хто-небудзь іншы, каб мірным шляхам пакласці канец халоднай вайне», — заявіў Гутэрыш, дадаўшы, што «свет страціў вялікага лідара, адданага шматбаковасці, і нястомнага змагара за мір».

«Мае спачуванні з нагоды смерці Міхаіла Гарбачова, чалавека свету, чый выбар адкрыў рускім шлях да свабоды. Яго імкненне да міру ў Еўропе змяніла нашу агульную гісторыю» — напісаў прэзідэнт Францыі Эмануэль Макрон.

Міхаіл Гарбачоў памёр 30 жніўня на 92-м годзе жыцця пасля працяглай хваробы.

У 1985 годзе Гарбачоў стаў генеральным сакратаром Камуністычнай партыі Савецкага Саюза (КПСС). Ён таксама з'яўляўся першым і адзіным прэзідэнтам СССР. Па яго ініцыятыве ў 1985-1991 гадах была зроблена спроба шматбаковых рэформаў у краіне пад назвай «Перабудова». У 1990 годзе ён быў уганараваны Нобелеўскай прэміяй міру.



Хочаце ведаць больш? Сачыце за нашымі публікацыямі ў Telegram і Facebook!

  • Апошняе на сайце
,
Больш цікавага на «Новым Часе»: