Крыніца: адзін з банкаў рыхтуецца да курсу 3,5-4 рублі за долар да вясны. Банкі абвяргаюць

У адным з беларускіх камерцыйных банкаў у прагнозах на другі-трэці квартал 2021-га ў песімістычным сцэнары закладзены курс долара ЗША 3,5-4 рублі. Пра гэта Myfin.by паведаміла крыніца ў банку. Журналісты апыталі некалькі банкаў, каб пацвердзіць або абвергнуць гэтую інфармацыю. І вось што даведаліся.

Па словах крыніцы, у адным з камерцыйных банкаў Беларусі рыхтуюцца да кратнай дэвальвацыі беларускага рубля ў выпадку рэзкага пагаршэння эканамічнай сітуацыі, у тым ліку з-за павелічэння дырэктыўнага крэдытавання. Паводле ягоных звестак, ва ўнутраных дакументах банка закладваецца дыяпазон дэвальвацыі 3,5-4 рублі за долар у самым горшым, песімістычным, прагнозе ўжо ў другім-трэцім квартале 2021-га года.

Вось як пракаментавалі гэтую інфармацыю у іншых банках.

«У стратэгіі на 2021-ы ў нас дакладна такога няма. У прагнозе закладваецца нязначны рост курсу долара па годзе на 20-30 капеек,» — распавялі ў «БПС-Ашчадбанку».

У банку «Дабрабыт» таксама пацвердзілі, што кратнага росту курсу долара ні адзін з прагнозаў у рамках стратэгіі не прадугледжвае.

У «Альфа-банку» паведамілі, што ў іх прагнозах такога сцэнару не існуе.

Яшчэ некалькі крыніц у камерцыйных банках на ўмовах ананімнасці сыходзяцца ў меркаванні, што такі сцэнар наўрад ці мог бы патрапіць у прагнозы дакументальна, бо вельмі высокая верагоднасць уцечкі дакумента, што можа лёгка справакаваць паніку на валютным рынку.

«Нават калі хтосьці такі апакаліптычны прагноз падрыхтаваў, ён наўрад ці ўключыў бы яго ў стратэгію банка, альбо нейкі іншы афіцыйны дакумент. Калі б ён усплыў, не абмінуць сур'ёзнага размовы ў Нацбанку. Больш падобна на фэйк або чарговыя чуткі», — паведамляе крыніца ў банку.