Праз крызіс у Кітаі падаюць сусветныя цэны на нафту

Гэты тыдзень пачаўся са значнага падзеньня сусьветных цэнаў на нафту. Інвэстараў напалохалі паведамленьні аб дрэнных паказьніках кітайскай эканомікі.

У панядзелак на закрыцьці Лёнданскай фондавай біржы барэль эўрапейскай нафты маркі Brent каштавала $94,55, страціўшы 3,7 працэнта адносна да цаны напрыканцы папярэдняй сэсіі, піша «Св*бода» са спасылкай на Gazeta Wyborcza. А на Нью-Ёркскай фондавай біржы барэль амэрыканскай нафты маркі WTI каштаваў 88,77 даляра, патаньнеўшы на 3,6 працэнта.

Падчас першай сэсіі гэтага тыдня цэны нафты на абедзьвюх біржах упалі ажно на 5%.

Цэны на нафту на мінулым тыдні зьнізілі асьцярогі глябальнай рэцэсіі. Цяпер інвэстараў напалохалі навіны аб дрэнным стане кітайскай эканомікі.

У панядзелак Нацыянальнае бюро статыстыкі Кітая абвясьціла, што прамысловая вытворчасьць у ліпені вырасла на 3,8 працэнта. У гадавым вылічэньні — гэта на 0,1 працэнтнага пункта менш, чым у чэрвені. А спажывецкія выдаткі вырасьлі ў параўнаньні з аналягічным пэрыядам мінулага года на 2,7 працэнта. Гэта азначае далейшае запаволеньне кітайскай эканомікі і рост страху кітайцаў выдаткоўваць грошы.

У асноўным гэта зьвязана з крэдытным крызісам на будаўнічым рынку. Пасьля некалькіх гадоў буму кітайскія дэвэлаперы пачалі банкрутаваць пад цяжарам даўгоў, выклікаючы фінансавыя праблемы таксама ў будаўнічых кампаній і іх партнэраў.