У Мінску адкрыецца крама, дзе ўсе тавары будуць прадаваць па фіксаванай цане

У Мінску з’явіцца буйны магазін фармату «усё па адной цане» — яго адкрые гандлёвая сетка «Усе ні па чым» ў цэнтры пастаянных распродажаў Leto.



Крама плошчай 250 «квадратаў» будзе працаваць у новым для Беларусі фармаце «variety store»: усе тавары будуць прадаваць па фіксаванай цане. Пакупнікам прапануюць будаўнічыя інструменты, посуд, касметыку, парфумерыю, цацкі, садовы інвентар і іншыя нехарчовыя тавары — усяго каля 4 тыс. пазіцый.

Кошт тавараў у сярэднім будзе ў 1,5 разы ніжэй, чым у крамах фармату «каля дома», а на некаторыя пазіцыі і таго больш — у 2-2,5 разы. Асаблівую цікавасць будуць прадстаўляць «маячковыя» тавары, якія прапануюць пакупнікам амаль па сабекошце. «Іх мэта — не столькі прынесці прыбытак, колькі прыцягнуць пакупнікоў. Многія тавары, напрыклад вёдры, будуць прадавацца па цэнах, па якіх іх не возьмеш нават у аптовага пастаўшчыка», — растлумачыў БелТА вядучы спецыяліст «Твая сталіца. Кіраванне праектамі» Аляксандр Вялікі.

Крамы падобнага фармату арыентаваны на імпульсную куплю, калі спажывец прымае рашэнне спантанна. Таму і адкрываюцца ў месцах інтэнсіўных пешаходных патокаў. Такім ўладальнікі сеткі «Усе ні па чым» палічылі цэнтр распродажаў Leto. «Фармат распродажаў прыцягвае людзей і павінен забяспечыць аб’екту інтэнсіўны трафік. А гэта ў сваю чаргу дазволіць нам прапанаваць вялікую колькасць тавараў па нізкіх коштах», — падкрэслілі ў гандлёвай сетцы.

Нагадаем, гандлёвы цэнтр Leto узведзены на месцы былога таксапарку на праспекце Жукава. Побач размешчаны мікрараёны Паўднёвы Захад, Грушаўка, Міхалова і Курасоўшчына. Зараз у будынку вядуцца аздобныя працы. Крамы ў цэнтры распродажаў адкрыюць каля паўсотні брэндавых сетак. Усе яны будуць прытрымлівацца канцэпцыі аб’екта — нізкія цэны і распродажы. Забудоўшчыкам гандлёвага цэнтра агульнай плошчай 23,7 тыс. кв. м выступае ААТ «Кіруючая кампанія холдынгу «БелГАЗаўтасэрвіс».