Зарабіць на замежных фурах не атрымліваецца. Дарагі дызель не набываюць

На днях на некаторых прымежных запраўках дызельнае паліва сталі прадаваць па 3,58 рубля (у 1,5 разу даражэй, чым на іншых АЗС краіны). Згадваўся асаблівы від ДП-Л-К5 ECO. Ён прызначаны для запраўкі замежных фур.


Журналісты Onliner заехалі на пару такіх АЗС у Брэсце, каб зірнуць, як ідзе гандаль. Аказалася, не вельмі.

Беларусь у якасці люстэркавых санкцый увяла забарону на ўезд грузавога транспарту, зарэгістраванага ў ЕС. Было вызначана некалькі месцаў, куды дазволена рухацца такім фурам для перачэпкі прычэпаў з грузамі. Усе гэтыя месцы знаходзяцца ў памежжы. Менавіта на запраўках, размешчаных непадалёк ад мяжы, і ўвялі гандаль новым відам дызелю за 3,58 рубля. Стандартнае дызельнае паліва на ўнутраным рынку каштуе 2,34 рубля.

«Белнафтахім» у сваім каментарыі спасылаўся на пастанову Саўміна №276. У ёй і замацавана, што на некаторых прыгранічных аўтазапраўках павінны прадаваць ДП-Л-К5, сорт С, ЕСО, ці ДП-З-К5, сорт F, ECO, ці ДП-З-К5, клас 0, ECO, ці ДП-З-К5, клас 2, ЕСО. Там жа паказаны і спіс заправак, на якіх будуць прадаваць дарагі дызель.

«У пералік патрапілі 12 АЗС, замацаваных за пунктамі пропуску і вызначанымі месцамі здзяйснення грузавых аперацый і перачэпкі, згодна з вызначаным маршрутам руху, — гаворыцца ў паведамленні канцэрна. — Цана на яго будзе вышэйшай за ўзровень рознічнай цаны на звычайныя віды дызельнага паліва ў РБ».

Але ўчора ажыятажу на прыгранічных запраўках не было.

Чаму не едуць запраўляцца? Быццам бы нават з улікам падаражання беларускі дызель таннейшы за польскі. 3,58 беларускага рубля за літр — гэта 1,41 долара. У суседняй з Брэстам Польшчы літр дызпаліва каштуе 1,65 долара. Па ідэі, тут запаўняць бак больш выгадна. У чым справа?

«Раней у нас тут былі чэргі. А цяпер паток рэзка знізіўся: нас абавязалі прадаваць менавіта ДП-ECO. З новай цаной дызелю за літр выходзіць роўна на адзін злоты танней, чым у Польшчы. Аднак кіроўцам-міжнароднікам у «суседзяў» вяртаюць ПДВ (падатак на даданую вартасць). Таму яны ўсе рэзка сталі запраўляцца з таго боку мяжы. З вяртаннем ПДВ у Польшчы выходзіць танней. І вось гэтыя два дні перасталі да нас заязджаць так, як раней», — тлумачылі журналістам на запраўцы каля пункта пропуску «Казловічы».

Думку пра выгаду за кошт вяртання ПДВ у Польшчы паўтарыў і аператар з другой прымежнай запраўкі.



Хочаце ведаць больш? Сачыце за нашымі публікацыямі ў Telegram і Facebook!

Больш цікавага на «Новым Часе»: