71-гадовая палітэмігрантка, якая здымалася ў Дудзя, завяла ютуб-канал аб жыцці ў Польшчы

Гарадзенка і палітэмігрантка Аляксандра Ханевіч у 71 гадоў рашуча пайшла ў «ютубчык», дзе адккрыла свой канал і цяпер распавядае пра жыццё ў эміграцыі. Гэта тая самая рухавая жанчына, якая ў 2020 годзе актыўна далучылася да пратэстаў, пасля была вымушаная пакінуць радзіму, а потым удзельнічала ў здымках фільма расійскага блогера Юрыя Дудзя.

У сваім канале Аляксандра Ханевіч распавядае пра сваё затрыманне пасля выбараў у 2020 годзе і ўцёкі з Беларусі ў Польшчу. Жанчына абяцае дзяліцца падрабязнасцямі — як гэта, пасля 70 пачынаць новае жыццё за мяжой.

«Мяне завуць Аляксандра Ханевіч, і я ўцякла з Беларусі. Цяпер будую сваё новае жыццё ў Польшчы. Тут я буду распавядаць пра сваё жыццё ў эміграцыі і не толькі», — так пачынаецца блог гарадзенкі.

Пакуль на канале толькі адно відэа. У ім Ханевіч распавядае пра тое, як і чаму яна ўцякала з Беларусі, пра сваю сямейную гісторыю пераследу і першы час пасля ўцёкаў.

Як нагадвае Hr*dna.life, Аляксандра Ханевіч працавала на заводзе «Хімвалакно» ўсё жыццё. На пенсіі стала старшынёй ветэранскай арганізацыі і нават збірала подпісы за Лукашэнку перад выбарамі. Затрыманні і гвалт 2020-га сталі для жанчыны шокам. Яе саму першы раз затрымалі, калі яна спрабавала адбіць у сілавікоў хлопца, падобнага на яе сына.

Пасля выбараў яе затрымлівалі двойчы. Пасля другога затрымання ёй давялося здымаць пабоі. Баючыся чарговага арышту, Ханевіч наважылася на ўцёкі ў Польшчу разам з сынам, якога таксама затрымлівалі. У снежні 2021 года яна прыехала ў вёску Кузніца.