Адбыўся чарговы суд над незалежным журналістам з Глыбокага Змітром Лупачам

Журналіста судзілі ўжо ў новым будынку Глыбоцкага райсуда, які адкрылі толькі некалькі дзён таму.

sud_zmicer_lupacz.jpg

Змітру Лупачу зноў інкрымінавалі парушэнне артыкула 22.9 КаАП (незаконны выраб прадукцыі СМІ). Гэтым разам суддзя Глыбоцкага раённага суда Андрэй Тарасевіч пакараў журналіста штрафам у памеры 35 базавых велічыняў (805 рублёў).
І хоць падчас адкрыцця новага будынка глыбоцкага суда старшыня Вярхоўнага суда Валянцін Сукала сказаў: «Тут ёсць усё, што патрэбна для правасуддзя, і ў той жа час зроблена прыгожа і зручна», правасуддзя не адбылося. Зміцер Лупач быў зноў пакараны, нягледзячы на тое, што, згодна з палажэннямі Закона «Аб сродках масавай інфармацыі», толькі рэдакцыі СМІ могуць прыцягвацца да адказнасці па артыкуле 22.9. Ён датычыцца толькі юрыдычных асобаў, а не фізічных.
 Як кажа Зміцер Лупач, яго пакаралі несправядліва:
«Гэты артыкул прадугледжвае, што адказнасць за выраб іраспаўсюд інфармацыі нясе юрыдычная асоба. А я – фізічная асоба, а не юрыдычная. Але падобныя прысуды адбываюцца паўсюль па краіне: і ў Глыбокім, і ў Гомелі, і ў Мінску. Таму лічу, што журналісцкай супольнасці трэба звяртацца да еўрапейскіх краін, каб праз міжнародныя структуры нейкім чынам аказваць ціск на нашую краіну. Той інстытут акрэдытацыі, які існуе ў Беларусі,трэба адмяніць. Бо такога няма ні ў адной цывілізаванай краіне, там чалавек можа свабодна распаўсюджваць інфармацыю. Гэта прадугледжвае і Дэкларацыя правоў чалавека, гадавіну якой мы будзем адзначаць праз месяц. Дарэчы, Беларусь таксама паставіла подпіс пад гэтым дакументам. І калі ўжо падпісаліся, то трэба і выконваць гэты дакумент».
Нагадаем, на глыбоцкага журналіста завялі адміністрацыйную справу за сюжэт пра далучэнне Глыбоцкага малочна-кансервавага камбіната да камбікормавага завода. Справу зноў ініцыявалі глыбоцкія міліцыянты, у прыватнасці старшы інспектар аддзела аховы правапарадку і прафілактыкі Глыбоцкага РАУС Вадзім Кучыц.
Сёлета гэта ўжо трэцяя адміністрацыйная справа, заведзеная на журналіста-фрылансера Змітра Лупача за супрацу з незалежным тэлеканалам «Белсат».
Паводле baj.by