Адкрыты збор сродкаў для сям'і Нікі Ніканавай. Сабрана ўжо больш за $15 тысяч

Грошы на дапамогу сям'і Нікі Ніканавай, якая загінула 25 ліпеня на Алясцы, збіраюць праз сайт GoFundMe, паведамляе Радыё Свабода.

Сям’і Нікі Ніканавай, рэжысёркі, якая патанула на Алясцы, працягваюць збіраць грошы. На плятформе GoFundMe менш чым за суткі з заяўленых 20 тысяч даляраў, сабралі больш за $15 тысяч. Адзін чалавек зрабіў перавод на 10 тысяч долараў.
Найперш грошы хочуць сабраць на пералёт у ЗША маці загінулай Вользе Ніканавай. Ніка Ніканава была рэжысёркай, яна даследавала тэму асуджаных за наркатычныя злачынствы ў Беларусі. У гэтым годзе яна зняла 20-хвілінны фільм «Пакаленне 328».
1 ліпеня Ніка Ніканава стала жонкай актывіста ініцыятывы Legalize Belarus Пятра Маркелава. Пётар Маркелаў і Ніка Ніканава пасля вяселля вандравалі па Алясцы, менавіта ў гэтым штаце яны хацелі застацца жыць. Маладыя дабраліся да аўтобусу, у якім жыў і памёр Крыстафэр МакКэндлес — герой кнігі Джона Кракаўэра «У дзікіх умовах».