Акцыяніст загадаў настаўнікам правесці дзень памяці святых. У ікону ён прыфаташопіў Бандэру

Некаторыя расійскія школы правялі акцыю ўшанавання святых Сцяпана і Святланы, якіх прыдумаў беларускі акцыяніст Уладзіслаў Бохан. Шмат эпічных фотажаб.

Беларускі мастак-акцыяніст Уладзіслаў Бохан правёў чарговую акцыю з прыцягненнем расійскіх настаўнікаў. Ён адправіў лісты ў расійскія школы з патрабаваннем правесці «усерасійскую акцыю памяці» і ўшанаваць Святога Сцяпана і Святую Святлану, піша Reform.by.

Акцыі правялі як мінімум у дзвюх школах Камчацкага краю. У адной са школ памяць «святых» ушанавалі, сфатаграфаваўшыся з абразамі і лампадкамі на фоне экрана з храмам, а ў другой пайшлі далей і збудавалі імправізаваны алтар.

Расійскія праўладныя тэлеграм-каналы назвалі акцыю правакацыяй і заявілі, што настаўнікі на яе не павяліся і патэлефанавалі ў паліцыю. Паведамляецца, што паліцыя праводзіць праверку.

Бохан рассылаў беларускім і расійскім школам лісты з патрабаваннем далучацца да розных флэшмобаў. Напрыклад, ён прапанаваў настаўнікам арганізаваць конкурс з перафразаваным дэвізам СС, правесці акцыю «Праца вызваляе», а таксама прадставіўся даверанай асобай Пуціна і папрасіў настаўнікаў развесіць плакаты аб сустрэчы з ім.