Авіякампаніі адмяняюць рэйсы на Блізкі Усход і прыпыняюць палёты над Іранам і Іракам

Пасля крушэння ўкраінскага «Боінга» некалькі авіякампаній абвясцілі, што будуць пазбягаць паветранай прасторы Ірана, акрамя таго, перавозчыкі адмяняюць рэйсы на Блізкі Усход. Пра гэта паведамляе CNBC.

Аб прыпыненні палётаў над Іранам паведамілі Singapore Airlines, China Airlines, Lufthansa, а таксама Malaysia Airlines. Палёты ў Багдад спынілі Emirates і Flydubai.
Па дадзеных Bloomberg, маршруты змянілі Air Canada і Srilankan Airlines. Як піша Reuters, рэйсы Урумчы — Тэгеран адмяніла China Southern Airlines. Не будзе лётаць над Іранам і Іракам Air France, перадае CNN.
Расавіяцыя рэкамендавала расійскім авіякампаніям не здзяйсняць палёты ў паветранай прасторы Ірана, Ірака, Персідскага і Аманскага заліваў, пішуць «Ведамасці».
Маршруты таксама памяняюць «Уральскія авіялініі» і S7, перадае ТАСС.
Самалёты «Белавія» будуць часова аблятаць тэрыторыю Ірана і Ірака, інфармуе Еўрарадыё са спасылкай на прэс-службу авіякампаніі. Адзіны рэйс (чартарны), які «Белавія» выконвае над тым рэгіёнам — Мінск — Дубай. Самалёт лётае раз на тыдзень. Бліжэйшы рэйс запланаваны на пятніцу, 10 студзеня.
Самалёт Boeing 737-800 NG (рэйс PS752, рэгістрацыйны нумар UR-PSR) вылецеў каля 6.10 8 студзеня маршрутам Тэгеран — Кіеў, знік з радараў праз некалькі хвілінаў пасля ўзлёту.
Усе на борце загінулі. На рэйс купілі квіткі 168 чалавек, але, паводле папярэдніх звестак, на борце было 167 пасажыраў, а таксама 9 чальцоў экіпажу.
Сярод загінулых у катастрофе было найбольш грамадзян Ірану (82 чалавекі) і Канады (63 чалавекі), а таксама 11 грамадзян Украіны (2 пасажыры і 9 чальцоў экіпажу), 10 грамадзян Швецыі, 4 — Афганістану, 3 — Нямеччыны і 3 — Вялікай Брытаніі, паведаміў міністр замежных спраў Украіны Вадзім Прыстайка.
Паводле папярэдніх звестак іранскага боку, самалёт разбіўся з тэхнічных прычынаў, якія прывялі да аварыі рухавіка. МАУ перадавала, што цяпер у Іране версіі тэракту або ракетнай атакі выключаюцца, але пазней выдаліла гэты сказ з прэс-рэлізу. У інтэрнэце ж распаўсюджваюцца розныя чуткі пра магчымую сувязь катастрофы з канфліктам Ірану і ЗША — ніякіх афіцыйных заяваў пра такую сувязь не было.