БАВГ рэалізуе праект "Чарнобыльская катастрофа і яе наступствы ў памяці жыхароў Беларусі"

Канферэнцыя «Чарнобыльская аварыя і грамадства: 30 год пасля катастрофы» пройдзе ў Мінску 15-16 красавіка 2016 года.



sputnik.by

У 2015 годзе Беларускі архіў вуснай гісторыі (БАВГ) звярнуўся ў сваіх даследаваннях да тэмы аварыі на Чарнобыльскай АЭС, якой хутка споўніцца 30 год.

Вясной і летам 2015 года Беларускі архіў вуснай гісторыі збіраў успаміны сведкаў Чарнобыльскай катастрофы (праводзіў інтэрв'ю з імі). Было сабрана больш за 40 інтэрв'ю з людзьмі, якія мелі рознае дачыненне да катастрофы: ліквідатарамі; перасяленцамі; тымі, хто застаўся жыць на забруджаных тэрыторыях ці вярнуўся на радзіму пасля перасялення; навукоўцамі; грамадскімі дзеячамі.

Некаторыя ўрыўкі гэтых інтэрв'ю можна паглядзець на сайце Беларускага архіва вуснай гісторыі.

Праца па запісу ўспамінаў сведак Чарнобыльскай аварыі працягваецца, таму у ахвочых ёсць магчымасць далучыцца да збору інтэрв'ю.

Кантакты:

электронны адрас: info@nashapamiac.org

паштовы адрас: МГА “Гісторыка”, 220030, г. Мінск, а/c128

тэлефон:  (029) 358 31 84

Праект БАВГ "Чарнобыльская катастрофа і яе наступствы ў памяці жыхароў Беларусі" таксама ўключае ў сябе конкурс студэнцкіх прац на чарнобыльскую тэматыку, заснаваных на матэрыялах вуснай гісторыі.

Нягледзячы на тое, што конкурс уваходзіць у фінальную стадыю,  ўсе зацікаўленыя яшчэ могуць паспець узяць у ім удзел.

Да ўдзелу запрашаюцца студэнты вышэйшых навучальных устаноў (у тым ліку магістранты), а таксама навучэнцы сярэдніх спецыяльных навучальных устаноў.

Апошні тэрмін падачы прац – 15 снежня 2015 года.

З умовамі ўдзелу можна пазнаёміцца ў раздзеле конкурс "Чарнобыльская катастрофа" на сайце БАВГ.  

Пераможцы атрымаюць каштоўныя прызы (галоўны прыз - ноўтбук). Лепшыя працы будуць апублікаваныя, а іх аўтары запрошаны на навуковую канферэнцыю з удзелам вядомых гісторыкаў, сацыёлагаў, палітолагаў.

Тыя ж адмыслоўцы, якія ўжо даўно скончылі ўніверсітэт, могуць таксама прадставіць свае даследаванні на ўзгаданай навуковай канферэнцыі, прысвечанай трыццацігоддзю аварыі на ЧАЭС.

Канферэнцыя «Чарнобыльская аварыя і грамадства: 30 год пасля катастрофы» адбудзецца ў Мінску 15-16 красавіка 2016 года.

Канферэнцыя будзе мець шматдысцыплінарны характар. Мы разлічваем  на ўдзел у ёй гісторыкаў, культуролагаў, палітолагаў, сацыёлагаў, літаратуразнаўцаў, а таксама прадстаўнікоў іншых сацыяльных і гуманітарных навук.

Падрабязней пра ўмовы ўдзелу ў канферэнцыі можна прачытаць на сайце БАВГ.