«Белапанаўцаў» Ірыну Леўшыну і Дзмітрыя Наважылава абвінавацілі ў «стварэнні экстрэмісцкага фарміравання»

«Свабодзе» стала вядома, што дырэктарцы «БелаПАН» Ірыне Леўшынай і былому кіраўніку кампаніі Дзмітрыю Наважылаву прад’явілі новыя абвінавачанні — у «стварэнні экстрэмісцкага фарміравання». Абое ў мінскім СІЗА з 18 жніўня.

За «стварэнне экстрэмісцкага фарміравання» пагражае пазбаўленне волі да 7 гадоў.

18 жніўня Леўшыну (на здымку) і Наважылава затрымалі нібыта за «арганізацыю масавых беспарадкаў» (арт. 342 Крымінальнага кодэкса). Пазней Следчы камітэт заявіў, што іх абвінавачваюць ва «ўхіленні ад сплаты падаткаў» (артыкул 243 КК).

Стала вядома, што таксама ў «стварэнні экстрэмісцкага фарміравання» абвінавацілі медыяменеджара Андрэя Аляксандрава. Ён у турме з 27 студзеня 2021 года. Аляксандрава абвінавачваюць у:

арганізацыі масавых беспарадкаў (арт. 342);

ухіленні ад сплаты падаткаў (арт. 243);

здрадзе Радзіме (арт. 356).

Цяпер яшчэ дадаўся арт. 361–1 КК.