Брэст: актывісты "Гавары праўду!" — за паляпшэнне дарог у горадзе

Брэсцкія актывісты кампаніі "Гавары праўду!" намецілі перспектыўныя мерапрыемствы, скіраваныя на паляпшэнне стану дарог у горадзе. Як паведаміў актывіст кампаніі Ігар Маслоўскі, 7 мая яны правялі круглы стол, дзе былі падведзены прамежкавыя вынікі распачатай сёлета рэгіянальнай кампаніі "Тысяча і адна ямка".



get_img59.jpg

Ігар Маслоўскі

"Гэту ініцыятыву ўжо ведаюць брэстаўчане і звяртаюцца з праблемамі дарог у рэгіёне ў нашу грамадскую прыёмную. Мы падтрымліваем гараджан у вырашэнні хвалючых іх пытанняў. У прыватнасці, дапамагаем скласці калектыўны зварот, абскардзіць адказы чыноўнікаў у вышэйстаячыя інстанцыі ў выпадку неабходнасці, сумесна арганізоўваем збор подпісаў", — дапоўніў Маслоўскі.
 

Паводле яго слоў, удзельнікі круглага стала прынялі рашэнне дабівацца ўкладкі тратуара ўздоўж дарогі паміж вуліцамі Ракасоўскага і Жукава ў мікрараёне Паўднёвы. У хуткім часе будуць адпраўлены адпаведныя скаргі ўладам, таксама намячаецца падача заявак на правядзенне пікетаў, каб прыцягнуць увагу да праблемы парушэння бяспекі руху пешаходаў.
 

"Апрача таго, плануецца пачаць збор подпісаў у мікрараёне Граеўка пад зваротам у гарвыканкам з патрабаваннем зрабіць рамонт дарогі і тратуар у гэтай частцы горада, праводзіць маніторыг стану дарожнага пакрыцця ў Брэсце, пры гэтым асаблівая ўвага будзе нададзена добраўпарадкаванню перыферыйных вуліц", — заявіў Маслоўскі.

Ларыса Шыганава, БелаПАН