Былы дырэктар Інстытута сацыялогіі Генадзь Коршунаў уладкаваўся ў ЕГУ

Генадзь Коршунаў пакінуў пасаду дырэктара Інстытута сацыялогіі Акадэміі навук у верасні мінулага года. Ён быў сярод тых навукоўцаў, якія асудзілі не толькі гвалт, але і фальсіфікацыі падчас прэзідэнцкіх выбараў.

Менавіта Генадзь Коршунаў незадоўга да прэзідэнцкіх выбараў пацвердзіў, што, паводле дадзеных красавіцкіх апытанняў, узровень даверу Лукашэнку ў сталіцы быў усяго 24%, нагадвае «Наша Ніва».

«Я зараз у нейкіх праектах разава ўдзельнічаю ў асноўным, — распавёў Генадзь Пятровіч «Народнай Волі». — Еўрапейскі гуманітарны ўніверсітэт прапанаваў у іх папрацаваць. У маім становішчы было б недарэчна адмаўляцца, таму як сацыёлаг-даследчык працую ў ЕГУ са студзеня гэтага года. Вялікі дзякуй універсітэту за гэтую прапанову!»

Нагадаем, раней у ЕГУ працаўладкаваліся 12 беларускіх выкладчыкаў з ліку тых, што былі звольненыя па палітычных матывах.