Чарговы суд над Аленай Гнаўк адбудзецца 2 верасня

З адной крымінальнай справы за танец у карагодзе ў Брэсце атрымалася яшчэ дзве: адміністрацыйная і крымінальная. Такі паварот адбыўся ў лёсе 64-гадовай Алены Гнаўк з вёскі Ткачы Пружанскага раёна, якая адбывае два гады «хатняй хіміі», піша «Радыё Рацыя»

Калі пратакол па адміністрацыйнай справе за дэманстрацыю нібы экстрэмісцкай кнігі адпраўлены суддзёй на дапрацоўку, то суд за абразу кіраўніка краіны пачнецца 2 верасня.

Жанчына ўжо пазнаёмілася са справай. Аказваецца, дзве новыя справы атрымаліся з лёгкай рукі пракурора Аляксандра Бараноўскага, які прысутнічаў на судзе ў якасці абвінаваўцы, кажа Алена Гнаўк:

— Бараноўскаму нібыта вельмі моцна даставалася на судзе. Ён нават пажаліўся суддзі, што вось я так сябе паводзіла, што я яго абвінавачвала. У цывілізаваным свеце абвінавачваемаму боку даецца права гаварыць усё, што думае наконт гэтай справы. І ў цывілізаваным свеце ніхто падобнага ніколі не робіць, тое, што зрабілі нашы пракуроры.

Паводле Алены Гнаўк, пракурор Бараноўскі, відаць, не ведаў, што за дэманстрацыю экстрэмісцкай кнігі чалавек не караецца, а толькі за распаўсюд. Ён не прапусціў таксама міма вушэй і словы Гнаўк, што ўладу ў Беларусі захапіў псіхічна не зусім здаровы чалавек.