Эміграцыя сама сябе не спыніць. Выпускнікоў-платнікаў таксама абавяжуць адпрацоўваць размеркаванне

Грамадства

«Прыгоннае права» ў лукашэнкаўскай Беларусі выходзіць на новы ўзровень. Пра гэта стала вядома па выніках сённяшняй нарады ў Лукашэнкі па пытаннях адукацыі.

licej_adukacyja_fota_dzmitryja_dzmitryeva_novy_czas4_logo.jpg.webp

Міністр адукацыі Андрэй Іванец падняў на нарадзе пытанне размеркавання выпускнікоў ВНУ. Абавязковае гэтае размеркаванне і так вельмі непапулярнае сярод студэнцтва, а тут раптам выявілася, што гэтую практыку плануюць распаўсюдзіць і на выпускнікоў-платнікаў.

— Сёння і бюджэтнік, і платнік, на нашу думку, павінен адпрацоўваць. Адпаведныя змены рыхтуем для ўнясення змяненняў у Кодэкс Рэспублікі Беларусь аб адукацыі, — заявіў міністр.

Чыноўнік нагадаў, што выпускнікі дзённай формы навучання на бюджэце адпрацоўваюць два гады, мэтавікі — не менш за пяць гадоў.

Лукашэнка, канешне, ініцыятыву кіраўніка Мінадукацыі падтрымаў.

— Непрымальна для краіны, калі спецыялісты з'язджаюць за мяжу, а мы так спакойна да гэтага ставімся. ВНУ скончыў, два гады адпрацаваў. Што такое два гады?! Гэта, лічыце, мы яго навучалі ў ВНУ і яшчэ праз настаўніцтва вопыт набывае. Мы яго навучаем два гады на працы, у школе, дапусцім, калі гэта настаўнік. І ён або медык з'язджае. Лічу, што тут павінны дзейнічаць забаронныя меры. Ну, ці хаця б паўзабаронныя. Дапусцім, пяць гадоў. Правільна, мэтавік-не менш за пяць гадоў. А можа быць, яшчэ і арыентаваць дзесьці акуратна, да сямі гадоў. У адваротным выпадку не ідзі ў мэтавікі, — сказаў Лукашэнка.


Пры гэтым, як звычайна, Лукашэнка лічыць, што на Захадзе сітуацыя з адукацыяй усё роўна горшая, чым у моцнай і квітнеючай Беларусі.

— Я параўноўваю з узроўнем аплаты там, на Захадзе. Там шалёныя грошы гэта каштуе. Таму добра, плацім столькі, добра — адпрацуйце.

Відавочна, што «прыгоннае права» рэжыму патрэбна, каб яшчэ больш прывязаць беларусаў да сваіх працоўных месцаў у краіне. Але ці спыніць гэта аддок спецыялістаў за мяжу? Наўрад ці, хутчэй, моладзь цяпер ужо пасля школы будзе планаваць атрыманне спецыяльнасці па-за Беларуссю, каб потым не адпрацоўваць лукашэнкаўскую «паншчыну».