Гаспадары арт-хутара запрашаюць творчых асобаў на бясплатную тыднёвую рэзідэнцыю

Гаспадары арт-хутара "Васіліна" ў Валожынскім раёне прапануюць паслугі рэзідэнцыі за дабрачыннае ахвяраванне.

"Беларускія пісьменнікі, мастакі, музыкі ды іншыя прадстаўнікі творчых прафесій! Мы вырашылі падтрымаць вас так, як можам, і запрашаем на бясплатную тыднёвую творчую рэзідэнцыю на арт-хутары “Васіліна”.

Гэта месца з ідэальнай атмасферай для поўнага занурэння ў стваральныя працэсы. Цішыня, адсутнасць суседзяў, панарамныя вокны з шыкоўнымі краявідамі — найлепшыя крыніцы натхнення. 

Калі вы працуеце над нейкім творам ці хочаце пачаць працаваць, але не можаце засяродзіцца і пастаянна адцягваецеся на будзённыя справы, то гэта тое, што вам трэба.

У вашым распараджэнні будзе цэлая вясковая хата з пячным ацяпленнем, магчымасцю гатаваць сабе ежу ці купляць гатовае харчаванне, а таксама шанец пазнаёміцца з сельскім бытам, вясковымі традыцыямі, гістарычнымі мясцінамі і прыродай",  — піша гаспадыня хутара на сваёй старонцы ў фэйсбуку.