Гомельскі абласны суд адмаўляецца тлумачыць, чаму суд па «справе Ціханоўскага» праходзіць у закрытым рэжыме

У будынку гомельскага СІЗА з 24 чэрвеня ў закрытым рэжыме судзяць адразу шасцярых палітвязняў: Сяргея Ціханоўскага, Ігара Лосіка, Мікалая Статкевіча, Уладзіміра Цыгановіча, Арцёма Сакава і Дзмітрыя Папова.

cihanouski_sud.jpeg_2.jpeg


Іх абвінавачваюць у арганізацыі масавых беспарадкаў, дзеянняў, якія груба парушаюць грамадскі парадак, распальванні сацыяльнай варожасці ў Беларусі падчас падрыхтоўкі і правядзення прэзідэнцкіх выбараў у 2020-м. Гомельскі абласны суд прыняў рашэнне закрыць працэс «у мэтах забеспячэння бяспекі ўдзельнікаў працэсу і абароны таямніцы, якая ахоўваецца законам». Аднак у чым складаецца небяспека, для каго менавіта і якая таямніца, не тлумачыцца. Грамадзяне звярнуліся за тлумачэннямі да старшыні Гомельскага абласнога суда Сяргея Шаўцова, але і ён не ўнёс яснасці ў пытанне.
Старшыня Гомельскага абласнога суда Сяргей Шаўцоў заявіў на зварот грамадзян, што рашэнні, звязаныя з прызначэннем і падрыхтоўкай судовага разбіральніцтва, прымаюцца суддзёй аднаасобна і пастанова аб прызначэнні судовага разбору абскарджванню не падлягае. Таксама ў Гомельскім абласным судзе нагадалі, што якое-небудзь умяшанне ў дзейнасць суддзяў па выкананні правасуддзя недапушчальнае і цягне за сабою адказнасць па законе.
У звароце суду, грамадзяне адзначылі, што адсутнасць магчымасці ацаніць заявы службовых асоб аб злачынным характары дзеянняў фігурантаў гэтай справы ставіць пад сумнеў дакладнасць іх выказванняў аб «наяўнай судовай перспектыве вынясення абвінаваўчага прысуду па гэтай справе ў сувязі з даказанасцю абвінавачання і неабвержнасцю сабраных доказаў».
Напрыклад, перад судом заяўлялі ў Следчым камітэце:
«абвінавачаныя каля года актыўна займаліся падрыхтоўкай і арганізацыяй вулічных беспарадкаў у Беларусі»;
«ідэалогіяй арганізацыі беспарадкаў з'явілася распальванне Ціханоўскім і яго саўдзельнікамі [...] сацыяльнай варожасці і розні ў краіне. Устаноўлена, што Ціханоўскі ў ютуб-канале "Страна для жизни" і аднайменным тэлеграм-канале адкрыта заклікаў да гвалту ў дачыненні да прадстаўнікоў улады і праваахоўных органаў, сваімі выказваннямі распальваў сацыяльную варожасць у грамадстве па прыкметах сацыяльнай прыналежнасці»;
«аднак і гэта яшчэ не ўсё. Вядома, што ў траўні мінулага года Ціханоўскі перашкодзіў працы Цэнтральнай камісіі па выбарах і правядзенні рэспубліканскіх рэферэндумаў, пагражаючы старшыні камісіі Лідзіі Ярмошынай, а таксама публічна заклікаючы ўварвацца ў яе дом».
На гэта Сяргей Шаўцоў адказаў, што дзейнасць праваахоўных органаў не адносіцца да кампетэнцыі суда, і не стаў больш нічога каментаваць.
У звароце да Гомельскага абласнога суда грамадзяне адзначалі вялікі грамадскі рэзананс крымінальнай справы над шасцярымі палітвязнямі і што закрыты суд над імі не выклікае даверу з боку грамадства. Старшыня аблсуда заявіў, што гэта толькі суб'ектыўнае меркаванне.
Ініцыятыва фонду Клуні «За справядлівасць» TrialWatch выступіла з заявай, у якой заклікае беларускі суд прадаставіць грамадскасці канкрэтныя падставы для правядзення закрытага судовага разбору, як таго патрабуе міжнароднае права ў галіне правоў чалавека.
Паводле слоў адвакаткі Ціханоўскага Наталлі Мацкевіч, «Ціханоўскаму ўручылі пастанову суда, у якой пастаноўлена, што крымінальная справа падлягае разгляду на закрытым судовым пасяджэнні "ў мэтах забеспячэння бяспекі ўдзельнікаў працэсу і абароны таямніцы, якая ахоўваецца законам". У чым складаецца небяспека, для каго менавіта і якая таямніца, не тлумачыцца».
«Паводле міжнароднага права, абвінавачаныя маюць права на публічнае судовае разбіральніцтва, за выключэннем асаблівых абставін. Адсутнасць галоснасці ў справе Ціханоўскага ставіць пад сумнеў справядлівасць дадзенага судовага працэсу», — адзначаецца ў заяве.
spring96.org