Кандыдатку абвінавацілі ў распальванні нацыянальнай варажнечы падчас «Ланцугу памяці» каля КДБ

Акруговая выбарчая камісія менскай Паўднёва-Заходняй выбарчай акругі № 99 вынесла папярэджанне кандыдатцы ў дэпутаты Алене Талстой за «Ланцуг памяці» каля будынку КДБ 29 кастрычніка,  паведамляе «Свабода».



Сам факт парушэнняў выбарчага заканадаўства 29 кастрычніка кандыдаткай устанавілі сябры камісіі па іншай акрузе — Купалаўскай № 95, адзначае паведамляе кампанія «Праваабаронцы за свабодныя выбары».

Паводле камісіі, пікет каля КДБ, прысвечаны ахвярам НКУС, расстраляным беларускім дзеячам культуры і навукі, не з’яўляўся перадвыбарчай агітацыяй і не пераследаваў мэту заахвоціць выбаршчыкаў да ўдзелу ў выбарах.

«Мела месца распаўсюджванне паведамленняў Талстой, якiя выклікаюць нацыянальную варажнечу (“Саюз з Расіяй — заўсёды вайна, галеча, рэпрэсіі супраць беларусаў”)», — пазначаецца ў рашэнні.

Камісія вынесла папярэджанне Талстой за тое, што інфармацыйны стэнд, размешчаны ў рамках правядзення пікету, утрымліваў інфармацыю, не звязаную з перадвыбарнай агітацыяй і быў напоўнены інфармацыяй, якая не мае дачынення да выбарчай кампаніі.

Акцыя адбывалася ў чарговую гадавіну «чорнай ночы» 1937 году, калі НКУС беспадстаўна расстраляў больш як сотню беларускіх паэтаў, пісьменнікаў, навукоўцаў, дзяржаўных дзеячаў.