Літва і Ірак дамовіліся супрацоўнічаць у пытанні міграцыйнага крызісу на беларуска-літоўскай мяжы

Міністр замежных спраў Літвы Габрыэлюс Ландсбергіс і яго іракскі калега Фуад Хусэйн на сустрэчы ў Багдадзе дамовіліся супрацоўнічаць для вырашэння крызісу нелегальнай міграцыі праз беларуска-літоўскую мяжу, паведамляе прэс-служба знешнепалітычнага ведамства Літвы.

«Ірак надае сур'ёзную ўвагу сітуацыі на літоўскай дзяржаўнай мяжы, — сказаў Ландсбергіс. — Акрамя таго, нам далі абяцанне пачаць расследаванне магчымай злачыннай сеткі, арганізаванай Беларуссю ў Іраку, якая выкарыстоўвае грамадзян Ірака, прадаючы ім туры ў Еўрапейскі Саюз, хоць яны не падарожнічаюць далей за лагер мігрантаў», — піша БелаПАН.

«Мы дамовіліся аб палітычных прынцыпах супрацоўніцтва. Тэхнічныя дэлегацыі больш падрабязна абмяркуюць канкрэтныя меры. Мы таксама дамовіліся аб іх сустрэчы ў бліжэйшы час», — дадаў міністр.