Літва ўсталюе відэакамеры ўздоўж усёй мяжы з Беларуссю. Плот з калючым дротам ужо актыўна будуецца

Прэм'ер-міністр Літвы Інгрыда Шымонітэ наведала памежны пункт імя Аляксандраса Бараўскаса ў Варэнскім раёне. Падчас візіту камандуючы Дзяржпамежслужбай Рустам Любаевас і прадстаўнікі кампаніі EPSO-G, якая рэалізуе праект фізічнай загароды на мяжы з Беларуссю, прадставілі прэм'еру ход работ.

Яна адзначыла, што ацэнка будаўніцтва праводзіцца рэгулярна, іншыя падрадчыкі актыўна ўключыліся ў працу, у сувязі з чым можна чакаць, што праект будзе завершаны ў тэрмін і ў рамках фінансавага плана, распавядае reform.by.

«Вельмі важна, што камеры будуць устаноўлены па ўсёй даўжыні сцяны ў канцы гэтага года», — сказала прэм'ер-міністр.

Калючы дрот ужо ўстаноўлены на ўсіх найбольш адчувальных участках, якія падвяргаюцца інтэнсіўнай міграцыі, а агульная працягласць бар'ера складае ўжо каля 200 кіламетраў. Штодня ён павялічваецца прыкладна на 3 кіламетры. У дадатак да гэтага бар'ера ўздоўж мяжы ў цяперашні час ўсталёўваюцца сегменты агароджы вышынёй 4 метры. На будаўніцтве бар'ера занята каля 600 рабочых. Кампаніі, якія працуюць на мяжы, мабілізавалі больш за 100 адзінак тэхнікі.