Лукашэнка: Ні юрыдычна, ні маральнага права беларусы не маюць не падтрымліваць Расію

Сёння Лукашэнка, ускладаючы кветкі на плошчы Перамогі, абвінаваціў краіны Захаду ў развязванні вайны ва Украіне.

Лукашэнка назваў сябе прадстаўніком народа-пераможцы і звярнуўся да народаў краін Захаду.
«Вашы палітыкі зрабілі вельмі шмат, каб вы забыліся, каму свет абавязаны вызваленнем ад фашызму. Сёння вельмі нямногія, якія жывуць за межамі Беларусі і Расіі, ведаюць, што Другую сусветную вайну выйграў савецкі салдат, Савецкі Саюз, што Другі фронт, пра які сёння шмат гавораць на Захадзе, адкрылі толькі летам 1944 года, калі перамога СССР стала відавочнай», — лічыць Лукашэнка.
На яго думку, адразу пасля вайны СССР пачалі "дэманізаваць", а разам з ім увесь "славянскі свет".
«Сярэднявечная барацьба за тэрыторыі і рэсурсы працягваецца. Толькі на змену крыжовым паходам прыйшла экспансія замежных фондаў. Тую ж агрэсію мы цяпер назіраем пад лозунгамі правоў чалавека і нейкага ўстойлівага развіцця краін», — сказаў ён.
Паводле яго слоў, "народы Захаду" выкарыстоўвалі "ў цёмную" ў Югаславіі, Іраку, а цяпер і Украіне. Ён лічыць, што паслядоўнікі нацызму не гатовы адкрыта змагацца са спадкаемцамі народа-пераможцы, таму напампоўваюць Украіну зброяй і зносяць помнікі. Лукашэнка заявіў, што заходнія эліты ўзгадавалі ва Украіне нацызм, зрынулі там законную ўладу і зрабілі нацызм дзяржаўнай ідэалогіяй, сутыкнулі ўкраінцаў і расійцаў.
«Вар'яцкія палітыкі Еўропы, перш за ўсё, не разумеюць, што выкарыстоўваючы сёння фашызм, нацызм ва Украіне, яны заўтра будуць змагацца супраць яго, таму што ён не можа быць замкнуты межамі адной краіны. Ён заўтра захлісне ўсю Еўропу. Жадалася, каб і ўкраінцы, якія паддаліся гэтаму, разумелі, што сёння яны героі, з іх робяць герояў, а заўтра іх будуць знішчаць, таму што нацызм у Еўропе не патрэбен. У тых заходніх краінах жадаюць, каб нацызм быў у нас, каб мы раздзіраліся супярэчнасцямі, каб мы пакутавалі. Я думаю, Захаду трэба над гэтай тэзай падумаць, а Украіне трэба падумаць над тым, каб не прыйшлося звяртацца да нас, каб выратаваць цэласнасць і адзінства ўкраінскай дзяржавы», — сказаў ён.
Лукашэнка мяркуе, што Украіну ўжо падзялілі на часткі, праўда, не сказаў хто, але намякнуў, што слухачы яго ведаюць.
«На шматпакутнай зямлі сёння грымяць выбухі і гінуць людзі. Так званыя нацбаты нішчаць народ па нацыянальнай прыкмеце, але агрэсарам калектыўны Захад называе Маскву і Мінск, таму і спрабуе выкрасліць з гісторыі нашу культуру, рускую культуру і шматвяковыя традыцыі», — сказаў ён.
Ён падкрэсліў, што, нягледзячы на ​​груз санкцый, будзе падтрымліваць Расію, а жыхары краін Захаду панясуць большыя страты, чым беларусы і расіяне.
«Не дзіўна, што мы, беларусы, падзяляем разам з расійцамі цяжар незаконных санкцый і абмежаванняў, ад якіх вам, простым еўрапейцам і амерыканцам, будзе нанесены большы ўрон, чым нам. Вы ўжо гэта адчулі, але гэта толькі пачатак», — сказаў Лукашэнка.
Паводле яго слоў, за мяжой нікога не хвалюе, што беларускае войска не ваюе.
«Там, за мяжой, нікога не хвалюе, што беларускае войска не ваюе, ігнаруецца тое, што мы зрабілі для найхутчэйшага спынення баявых дзеянняў у свой час, ды і зараз імкнемся паводзіць сябе такім чынам. Мы мірныя людзі, але нават не спрабуйце размаўляць з намі з пазіцыі сілы. Вашы мары загнаць славян у новае рабства, якое вы называеце глабалізмам, нязбытныя», — дадаў ён.
Лукашэнка абвінаваціў Захад у развязванні вайны. Паводле яго слоў, увесь Захад ваюе супраць Расіі ва Украіне.
«Адумайцеся, ні юрыдычна, ні маральнага права беларусы не маюць не падтрымліваць Расію. Мы заўсёды былі разам. Мы заўсёды былі адзіныя. І што б вы ні рабілі, якія б стрэлы ні кідалі ў наш бок, у вас не атрымаецца нас раз'яднаць», — сказаў ён.
Паводле яго слоў, супраць Расіі аб'ядналіся 50 краін.
«Хачу, каб усе мяне яшчэ раз на Захада пачулі. Беларусы — не агрэсары, але застаючыся саюзнікам і партнёрам брацкай Расіі, мы будзем яе ўсяляк падтрымліваць», — сказаў ён.
Кіраўнік Беларусі папракнуў заходніх паслоў у тым, што яны адсутнічаюць на плошчы Перамогі сёння і ў той жа час заклікаў заходнія краіны «пакінуць нас у спакоі». Ён заклікаў Захад адмовіцца ад сваёй палітыкі.