Маладога міліцыянта звольнілі ў першы год адпрацоўкі, цяпер ён мусіць сплаціць ВНУ аграмадныя грошы
Гомельскага міліцыянта звольнілі за «правіну» ў першы год адпрацоўкі — і цяпер ён вінны Акадэміі МУС велізарную суму, піша «Люстэрка».
У Гомелі маладога міліцыянта звольнілі са службы па артыкуле — за правіну, несумяшчальную з працай у органах унутраных спраў. У хлопца гэта быў першы год працы пасля Акадэміі МУС.
ВНУ падала на яго ў суд і прымусіла плаціць за неадпрацаванае размеркаванне. Сума аказалася велізарнай — падрабязнасці паведамляюцца ў рашэнні суда.
Дзмітрый (імя зменена) вучыўся ў Акадэміі МУС на спецыяльнасці «правазнаўства» следча-экспертнага факультэта. ВНУ цалкам забяспечвае будучых сілавікоў — гарантуе пражыванне, харчаванне, абмундзіраванне, грашовае забеспячэнне. Узамен кожны абітурыент пры паступленні бярэ абавязацельства пасля выпуску адпрацаваць у МУС як мінімум пяць гадоў.
Глядзіце таксама
Дзмітрыя пасля заканчэння Акадэміі адправілі служыць у Цэнтральнае РАУС Гомеля. Але нешта пайшло не так, і маладога чалавека звольнілі са службы за нейкую правіну, якая з’яўляецца падставай для датэрміновага скасавання кантракта. Замест 60 месяцаў ён адпрацаваў толькі дзевяць.
У выпадку звальнення міліцыянта за злачынства, невыкананне кантракта, правіну да заканчэння размеркавання ён абавязаны кампенсаваць ВНУ не толькі кошт навучання, але і ўсе астатнія выдаткі. Сума разлічваецца прапарцыйна неадпрацаванаму тэрміну кантракта.
Акадэмія МУС палічыла выдаткі на Дзмітрыя: аказалася, за чатыры гады на падрыхтоўку міліцыянта выдаткавалі 81 260 рублёў. Паколькі дзевяць месяцаў ён усё ж адпрацаваў, яму выставілі крыху меншы рахунак — на 69 071 рубель. Хлопец не кампенсаваў выдаткі добраахвотна, таму ВНУ падала супраць яго пазоў.
Глядзіце таксама
На пасяджэнні суд заканамерна прыняў бок Акадэміі. Былы міліцыянт пагадзіўся з выстаўленымі яму патрабаваннямі. Ён мусіць будзе вярнуць ВНУ ўсе 69 тысяч.
Але гэтым яго запазычанасць не абмежавалася. Як з боку, які прайграў, суд спагнаў з маладога чалавека законную дзяржпошліну ў 5% ад сумы пазову — а гэта яшчэ 3453 рублі.
То-бок за звальненне з міліцыі хлопцу давядзецца заплаціць 72,5 тысячы рублёў.
Глядзіце таксама
