Маладзёнаў судзяць за інсталяцыю з ЛГБТ-клумбай перад будынкам МУС

Студэнты тэатральнай лабараторыі Fortinbras Вольга Рамашка, Надзея Крапівіна і Дзмітрый Яфрэмаў, якія 28 чэрвеня стварылі ЛГБТ-клумбу перад будынкам беларускага МУС, сумна вядомага гамафобнымі поглядамі яго кіраўніцтва, былі затрыманыя, і адпраўленыя да суда ў прыёмнік-размеркавальнік на вуліцы Акрэсціна.

Прозвішчы затрыманых паведаміў у сацыяльных сетках вядомы драматург і рэжысёр Мікалай Халезін.
Разам з уддзельнікамі перфомансу быў затрыманы пазаштатны карэспандэнт агенцтва БелаПАН Андрэй Шаўлюга. Каля 16:00 ён фатаграфаваў акцыю ў падтрымку ЛГБТ-супольнасці.

 Удзельнікі тэатральнай лабараторыі Fortinbras пры Беларускім Свабодным тэатры Вольга Рамашка і Дзмітрый Яфрэмаў дастаўленыя ў суд Заводскага раёну Мінску. Вольга Рамашка сказала карэспандэнту Свабоды, што іх не пакармілі раніцай, ваду давалі. Надзею Крапівіну, паводле праваабаронцаў, пакінулі ў турме на Акрэсціна, паколькі яна сама з Горадні. Туды і будзе накіраваны пратакол правапарушэння.
У судзе Першамайскага раёну судзяць журналіста Андрэя Шаўлюгу, які здымаў акцыю. Пазаштатнага карэспандэнта БелаПАН абвінавачваюць у «непадпарадкаванні праваахоўнікам».
Шаўлюга заявіў на судзе, што супраціў не аказваў, добраахвотна выйшаў з машыны, якая даставіла яго ў РАУС Маскоўскага раёну Менска. Паводле журналіста, болей за пяць гадзінаў яго і актывістаў трымалі ў РАУС і не тлумачылі, за што арыштавалі.​
Чацьвёра затрыманых правялі ноч у ізалятары на вуліцы Акрэсціна.

Сакратарка суду забараніла здымаць Белсату ў будынку. Кажа: "Вы жа ад БАЖа, наколькі я памятаю".
 

Суддзя Сташкевіч Юрый разглядае справу Вольгі Рамашка, суддзя Анастасія Осіпчык — справу Дзмітрыя Яфрэмава. Затрымалі іх за парушэнне добраўпарадкавання горада, але чамусці маёр Ермаловіч склаў пратакол па арт. 23.4 (непадпарадкаванне).
У Першамайскім судзе слухаецца справа журналіста БелаПАН Андрэя Шаўлюгі. Суддзя Анастасія Папко.
Паводле spring96.org, svaboda.org